Monday 12 May 2014

Assembliée ès Jannes Gens 2014

Châque année des jannes gens des Colléges et d's êcoles s'gondaithes ont eune assembliée dans la Chambre des Êtats, où'est qu'i' prennent les pliaiches des membres êlus pouor des d'bats sus des divèrs propositions.  L'întention est d'lus donner pus d'înformâtion sus la politique.

Tchestchions sans dgèrnissement au Chef Minnistre, lé Sénateu Ian Gorst

Tchestchion:
Lé Chef Minnistre, crai-t-i' qu'nou pouôrrait faithe pus pouor la promotion du Jèrriais?

Chef Minnistre:
J'crai qué l'êffort par l'Êducâtion à l'ensîngni est d'tchi positif – y'a pus d'gens à l'pâler dans l's êcoles. Mes grands-pathents par mathiage soulaient l'pâler mais i' n'sont pus auve nous. Mes pathents par mathiage l'pâlent acouo, mais pas si souvent qué soulaient faithe les grands-pathents, et j'crai qué si j'lus pâlais, i' dîthaient qu'i' y'eut un changement, quand auprès l'Otchupâtion, dans l's êcoles nou dit ès êtudgiants qu'i' n'fallait pon l'pâler mais d'pâler rein qué l'Angliais, et qué l'Angliais s'en allait êt' la langue du conmèrce et la langue dé l'av'nîn, et ch'tait ches décisions-là tchi, à m'n idée, l'ont mînt sus san mouothi. Ouaithe qué ch'sait împortant dé l'ensîngni viyant qué ch'est eune partie d'not' héthitage et d'not tchultuthe, pouor dé mé jé n'peurs pon l'vaie aussi d'l'avant comme ch'tait d'vant l'Otchupâtion.

No comments: