Tuesday 20 May 2014

1954: La Baie d'Saint Ou (1)

Auprès la dgèrre nou proposit d'êcalopper la baie d'Saint Ouën (ou la Baie d'Saint Ou) et d'y bâti eune ville. Ph'lippe et Merrienne 'taient contre. Ch't' articl'ye pathut dans Les Chroniques de Jersey l'27/3/1954 - n'en v'chîn lé c'menchement:

There was a post-War project to build up Saint Ouen's Bay with urban development. Edward Le Brocq's two Saint Ouennais characters were opposed, as shown in the first part of an article from March 1954:

La Baie d'Saint-Ou
La Merrienne est bein intérêssie dans chein tchi s'pâsse dans l's'Etats au sujet d'la Baie d'Saint-Ou. chaque jour ch'est la même histouaithe, et quand je n's'y pas là ou va siez tchique vaisin pour savé tchèqu'il en pense.

Quand à mé, j'm'en fiche bein, car chais jours j'n'y vais pas souvent à la Baie, et chais mêssieux d'la Ville tch'y sont si intérêssis m'font rithe. sûs chu point-là je s'y d'l'avis d'la Merrienne tch'y f'thaient bein mûs d'taithe lûs béque et d'lûs mêlé d'lûs affaithes.

Comme ou s'fait: "A qu'menchi ch'est à nous Saint-Ouennais qu'oulle appartcheint, la Baie. Il est vrai qu'y'en a un mio dans Saint-Piêrre et un morcé dans Saint-Brelade, mais ou n'est pas app'lée la Baie d'Saint-Ou pour rain, et ch'est à nous de décidé si y'étha des maisons d'bâties là ou non."

"Bon," j'l'y dit, "mais en approuve-tu d'avé des bâtisses tout l'long d'la Baie?"

"Mais cèrtainement, nânin, j'n'en approuve pas. Y'en a dêjà bein trop, et la piupart n'sont pas d's'ornements. Si j'pouvais, j'abbat'rais tout."

"A chu compte-la," j'ly dis, "tu vot'tais pas pour l'idée de bâti une ville à l'Eta?"

"Crais-tu que j's'y folle?" ou dit. "Une ville à l'Eta. Honnêtement, Ph'lip, j'qu'menche à craithe que y'a des Comités tch'y dév'thaient être à l'Asile. Un biau site pour une ville, ma fé! Tchèsque-y s'sa la préchaine chose?"

(à siéthe)

No comments: