La Fête Nouormande 2014

Né v'chîn un progranme en stchelette pouor la Fête Nouormande 2014. Mèrcie d'pâsser tout l'tou et d'faithe cirtchuler!

Ch'est préveu qu'lé progranme du grand weekend s'en va siéthe à tchiquechose près l'même progranme qu'la dreine fais à Saint Hélyi. Un changement: nou propose dé m'ner la pathade par les rues d'la Ville épis rester sus la pièche au marchi pouor mangi.

Lé Sanm'di au sé: un concèrt dé Badlabecques. Eune tchestchion: y'a-t-i' d'aut's dgaîngues dé musiciens/chanteurs tchi voudraient ofûche asseûther eune partie d'la preunmié maîntchi du concèrt? S'i' y'en a, j'l'organnîs'sons coumme chennechîn: 1é maîntchi, învités - 2e maîntchi, Badlabecques. Mèrcie d'nos faithe assaver l'pus tôt qu'pôssibl'ye.

Lé Vendrédi au sé: ch'est la Grande Lévée siez l'Gouvèrneux (à l'occâsion d'l'annivèrsaithe d'Sa Majesté, S'n Excellence lé Lieut'nant Gouvèrneux învite les gens d'Jèrri et lus învités à eune bordée dans les grands gardîns d'la résidence officielle - grande tente, champangne, musique, discours, tith'thie d'cannons...). Pouor les cheins tchi veulent arriver l'Vendrédi, j'allons aller siez l'Gouvèrneux. Nou pouôrra y'aller en costeunme Nouormand - mais pouor des raisons protocolaithes, i' faudra înformer la Maîson du Gouvèrneux à l'avanche combein d'monde veindront en costeunme. S'i' y'a des cheins tchi sont întérêssis dé v'nîn ès célébrâtions d'Vendrédi au sé, mèrcie d'nos faithe assaver.

(duthant la s'maine 9-13 dé Juîn) Mouontréthie d'livres à la bibliothèque - mouontréthie d'portraits des mousses des Pallions

• Lundi 9 Lanch'chie et liêthie (à La Société Jersiaise? 6h du sé)
• Mardi 10 Quiz (chasse ès rêponses) en Ville - 6h du sé; pus tard, à l'aubèrge
• Mêcrédi 11 Gamme dé Doque (La Pathade) - 6h du sé; pus tard, dînner
• Jeudi 12 Vîsite au Musée Mathitînme (?) / à La Hougue Bie (?) lé sé
• Vendrédi 13 L'Annivèrsaithe dé la Reine, Not' Duc - aller à la L'vée du Gouvèrneux (6h30 du sé)

Grand Weekend 14-15 dé Juîn

Sanm'di matîn 14 èrcitâtions étc (Salle Pârouaîssiale dé Saint Hélyi)

méjeu: pathade en Ville (Salle Pârouaîssiale, La Plianque Billot, La Rue d'Driéthe, Lé Vièr Marchi, Lé Bridge)
mangi au marchi Nouormand

Sanm'di l'arlévée èrcitâtions étc (Salle Pârouaîssiale dé Saint Hélyi)

Sanm'di au sé concèrt/séthée - Badlabecques (et d'aut's învités?)

Dînmanche matîn 15 sèrvice à la chapelle
vîsite dgidée (au Fort Régent? Musée?)

Dînmanche l'arlévée èrcitâtions, danses étc à l'înformelle (Salle Pârouaîssiale dé Saint Hélyi)