GW de Carteret spins a tale of avian war work:
A la fin! Notr' tâche dans la campangne est à peu près finie, pour le moment, J'avons, entre mai et ma famille, clièrgi tout ch'qui y'avait d'mulots et de p'tites taupes hors de d'dans vingt-deux vrégies d'patates, dans chinq vrégies trente perques de froment, six et d'mi idem d'avaine, trais becquets d'panais déjà belles en freulles, et j'avais passè l'haugard chinq fais au cliai d'la lune, tout chonna dans les deux difféthentes fermes y'où qu'le Coumity d'la D'fense de l'Ile nos avait envyès faithe du travas d'ghèrre. Si y'a une famille en Jerry qui peut s'vanter d'aver bein fait san d'vair en l'annèe 1917, pour faithe en sorte que toute la nouorrituthe possible s'sait produite, ch'est bein la famille du Caouain.
J'en avons yeu des expériences! J'en avons ouï du cliai' et d'l'êpais! J'en avons veu des scènes, dans l'couothant d'notr' saison! Si Moussieu l'Doyen veurt avait une conférence hors du commun à sa Société Littéraire ou si Jock Luce r'organise des séthèes d'Jerriais, i' n'ont qu'à me d'mander d'lus raconter tchic chose de notr' travas chès s'maines ichin; nou dit que l'hibou est le symbole de la sagesse je lus prouv'thai qu'ch'est vrai et en même temps je baill'lai d'ma bec assez pour les abuser un p'tit d'temps, allèz!
Pus qu'chonna: si l'Sieur Englefield veurt rempl'yi le Cinéma West, qu'i' nos d'mande de lis r'présenter la bordèe tragique, Le fouangno' des Caouains êdghéthé dans une raniéthe de taupe.
Et j'pouorréthions offrir à Moussieu Franks de l'Opera House, la farce de Marie Hibou pourchassèe par la belle-mèthe à Laïesse Ernon. Même les vielles filles s'en êgouff'thaient à rithe.
(à siéthe)
No comments:
Post a Comment