À tout seigneur, tout honneur
San Antonio, Texas, USA.
Lé 26 d'mar, 1983.
Moussieu l'Rédacteu,
La gâzette du 17 dé mar, tchi veint d'arriver, est plieine dé nouvelles et dé p'tits buts tchi sont întérêssants pour un Jèrriais en exil. La "pièce de résistance" sans doute est la page tchi nouos montre un bieau portrait dé Moussieu Vernon Tomes, lé Protchuleux Général dé Sa Majesté la Reine, nouot' Duc, et tch'explyique un mio d'ses fonctions officielles.
Un vrai Moussieu, lé Sieur Tomes. I' n'a pon un brîn d'ordgi autrement qué l'ordgi d'êt' un offici si împortant d'la Couronne. Pourtant, nou peut dithe qué ch'est aîsi à porter, qué d'l'ordgi, ch'n'est pon bein pésant, et ch'est à san crédit tch'i' n'en a pon d'la sorte tchi pu. J'mé r'souveins d'li quand il 'tait clèrcot dans La Rue Trousse-Cotillon. Si ma mémouaithe n'est pon trop fautive (j'sai bein qu' j'c'menche à en pèrdre), il 'tait dans l'office à Moussieu Lyndon Rive. Il avait tréjous l'souôri sus la fache et 'tait iun des pus av'nants jannes hommes qué j'connaissais. J'sis ordgilleux d'aver connu un Moussieu d'san calibre, et j'lî souhaite eune longue vie dans l'sèrvice dé l'Île et d'la Couronne.
En liêsant ses r'mèrques entouôrre lé fait qué l'jury d'au jour d'aniet a eune tendance d'êt' mains sévéthe qué dans l'temps jadis, i' m'veint à l'idée qué ch'est eune attitude hardi êvidente dé nouos jours. Ichîn en Améthique lé malfaiteur a tant d'privilèges qué la police a quâsi d'la peine à l'arrêter. I' faut l'avèrti du tas dé drouaits tchi lî'appartcheinnent dévant l'mett' en cage, et l'affaithe est v'nue au point qu' un agent d'police hésite tchiquefais d'arrêter un malfaiteur si ch'est eune affaithe dé maîndre délit. Sans doute, j'avons un mauvais système juridique ichîn en Améthique, iou qué les Juges de Paix sont êlus par lé peupl'ye. J'sis d'avis qu' ch'est un mauvais système car ch'est tout naturel qu'un Juge tch'est êlu hésite d'offenser les cheins tchi l'ont mîns sus l'siège dé justice quand i' sont présentés d'vant li. Comme nouos dit l'vièr diton: "Tch'a un anmîn en Cour, san procès est pus court!"
Moussieu Tomes otchupe lé siège dîngnement tch'a'té otchupé dans man janne temps par des illustres Mêssieux comme Mêssieux Adolphus Hilgrove Turner, Henri Edouard Le Vavasseur dit Durell et Charles Edouard Malet de Carteret, touos des mangnifiques orateurs. Ch'tait Moussieu Malet d'Carterer tch'était Protchuleux quand j'm'en fut à la dgèrre.
Un aut' mio d'nouvelles qué j'vai dans chutte gâzette est dans la colonne tchi nouos ramémouaithe les êvenèments dé y'a chînquante ans, où'est tchi nouos est dit qu' eune bourse dé septante-chîn louis par an fut accordée à Moussieu (pus tard lé Révérend) Lawrence Francis Morel Helleur. Lé Révérend Moussieu Helleur en prîns bouan avantage, car il a l'drouait d'mett' lé titre dé Maître ès Arts au but d'san nom.
Un vrai Jèrriais dans l'âme, Moussieu Helleur. J'ôse craithe tch'il est probabliément lé seul ministre tchi nouos reste en Jèrri tchi pâle lé Jèrriais comme i' faut. Il a prêchi des sèrmons dans nouot' vielle langue ès sèrvices annuels dé L'Assembliée d'Jèrriais. Et j'l'ai veu aîdgi au Révérend Moussieu Michael Halliwell à célébrer la Sainte Cène en Français, faisant sèrvi nouot' précieuse vielle Litourgie pour l'occâsion.
Mais j'veurs èrmèrcier Moussieu Helleur tout partitchulièthement pour sa fidélité et sa bonté à m'n êgard quand j'ai 'té malade duthant mes visites dé ches dreines années en Jèrri. I' v'nait m'vaie à l'Hôpita, et pus d'eune fais il a prîns la peine dé v'nîn d'la Ville jusqu' au Ménage ès Feuvres à St. Ouën m'apporter des flieurs et des fruits. Ch'tait cèrtainement un sacrifice dé sa part dé v'nîn si liain d'la Ville. Et l'Révérend Jeffrey Hollis, dé St. Luc, m'a 'té bouan étout, et j'sis r'connaîssant à touos les deux.
J'félicite lé Chent'nyi Dennis Èrnon pour avec ieu l'couothage dé continuer comme Chent'nyi d'St Ouën pour la siexième fais. Les St. Ouënnais ont la chance d'aver un homme dé san calibre pour sèrvi si longtemps dans un poste tchi nouos ramémouaithe si bein d'chu vièr diton tchi nouos dit qué l'chein tchi sèrt lé publyi sèrt un îngrat.
J'sis du même avis que l'fanmeux "Meridian" qué l'idée dé ravigoter la Milice Rouoyale dé Jèrri pour attraper et peunni les vandales n'est pon bein pratique. À m'n idée, ch'est la baiette qué les vandales méthitent, et pis d'faithe les pathents payi pour les d'gâts. Eune fais qu' les frais touchîssent la pouchette, les pathents c'mench'chaient à prendre avis à la condite dé lus garçons. Mais en liêsant chennechîn les gens s'en vont craithe que j'sis bruta d'natuthe. J'n'y sis pon rêellement, mais i' n'faut pon oublier un aut' vièr diton tchi nouos ouos dit: "Ès grands maux les grands r'mièdes."
George d'La Forge
No comments:
Post a Comment