Monday 31 March 2014

1917: du travas d'dgèrre - war work (2)

Acouo du niolîn du Caouain dans Les Chroniques de Jersey du 28/7/1917 ( à noter: l'diton "Ch'est la peîle (ou l'chaudron) tch'appelle lé trépi nièr tchu", et la mention du Vièr Noué):

More stuff and nonsense from GW de Carteret (NB: the unmentionable diton alluded to is the ruder Jèrriais equivalent of the pot calling the kettle black; and Old Christmas Day was evidently still being marked in Jersey during WWI):

(siette)
Nou s'en va avair un p'tit mio pus de temps à r'garder l'tou' d'sai. Déjà, j'ai y'eu la chance de passer une demi-heuthe, une saithèe ou deux, ès êcoutes d'un bord et d'l'autre à tâchi d'ramasser tchic brin d'nouvelles pour la gazette. Naturellement, j'n'ai pon peu aller ailleurs que dans l'vaisiné, notr' accord ov le Coumity d'la D'fense de l'Ile étant que nou restethait dans l's'envithons d'la plièche y'où qu'notr' travas se dounne. Ch'la fait que mes renseignements sont pus ou mains limités; mais qu'i' le s'saient tant qu'i' voudront, y'a tréjous tchic chjose de pus ou mains intéressant.

Dimanche au sai, par exempl'ye, je m'trouvais souos une touffe de housse à la carre d'un gardin, quand j'ouï deux hoummes qui pronaient y'un d'chaque bord de la hèche en attendant que lus femmes ervinssent de la chapelle.

"Nou trouvait à r'dithe contre le Counnétabl'ye," se faisait le pus maigre des deux (un houmme avec des lunettes et un gris chapé) "parcequ'il avait attendu un p'tit d'temps depis qu'sa gestion était finie d'vant prendre de m'suthes pour une nouvelle êlection."

"Eh bein, tch'est qu'en est?" d'mandi san parchounn'yi, - un gros, frais rasé, ov une casaque à carrieaux.

"Il en est," erprint le maigre, "qu'à matin, en r'gardant un mio de vielle gazette qu'était à bouchi une fenêtre, j'ai veu qu'la date était du mais d'Janvi 1914 et que l'jour du vièr Noé de ch't'annèe-là, deux messieux avaient 'tè élus Protchuleurs du Bien Public, dans la même paraisse. Les v'là aller sur la quatrième annèe bein avanchie mais i' n'pathaît pon y'avair occouo de mouv'ment pour les ré-êlithe ou les remplièchi..."

L'autre l'interrompit en disant tchic chose entouor un trépi et un chaudron, mais le dit-on était trop grossi pour qu'nou l'imprime dans une gazette qui s'respecte. Ou savez bein...
(à siéthe)

No comments: