La pathole d'aniet – Jèrriais word of today

 La pathole d'aniet – Jèrriais word of today: les mielles - the dunes 

Bouônjour à matîn - Good morning

  Bouônjour à matîn - Good morning

La pathole d'aniet – Jèrriais word of today

 La pathole d'aniet – Jèrriais word of today: Souothé - Sorel 

Bouônjour à matîn - Good morning

  Bouônjour à matîn - Good morning

1918: Man Crime (3)

(siette et fîn)

LE RÉSUMÉ DU PRÉSIDENT

 

Quand l'huissier eut portè un tas d'actes, de régliément et d'autres dotchuments au Président, et que deux-trais des membres du Jury qui pathaissaient enn'yés se fudrent crainchis un mio, le Président s'mins à d'viser. Le Jury qu'avait ergardè à gauche tout l'temps qu'l'Avocat pâlait, ergardit drait endrait li.

 

"Man d'vair, fit l'Président, ch'est d'rêsumer les débats, de mettre les points sur les I et d'rappeler le Jury au sens d'la gravitè d'la cause. Mais l'affaithe est si cliaithe, que j'n'en ai que pour deux minutes..."

 

Par chu temps-là, la tête me touannait, les ouothelles me cônaient, mes yeux 'taient touos embrouoillis. Je n'discèrnais pus dghéthe chein qui s'passait l'tou' d'mai. Je m'renvèrtchi sus man banc, j'frumi les yièrs et j'attendi. Sans m'êvanni tout à fait, j'tais réellement hors de connaissance.

 

LE VERDICT

 

Combien d'temps que j'fu' d'même, je n'le sai' pas, mais quand je r'prins un mio mes sens, le Jury v'nait d'rentrer. Teddy Boielle le chef, 'tait d'bu. I' disait, dans une vouaix d'entrepreneux d'enterrement:

 

La pathole d'aniet – Jèrriais word of today

 La pathole d'aniet – Jèrriais word of today: les grupieaux - the stony places 

Bouônjour à matîn - Good morning

  Bouônjour à matîn - Good morning

1918: Man Crime (2)

 (siette)

NOUORRITUTHE RÉGLIÉMENTAITHE

 

Les policemen qu'avaient fait la fouolle fudrent entendus. Y'un d'y'eux produisit le catalogue qui faisait mention d'allumettes à bouan marchi qu'il avait dênichi dans l'imprim'thie, mais l'Bailli dit qu'i' datait de 1900 et n'pouvait dons pas être suspect.

 

L'autre policeman produisit le lunch à Fraink Amin, qu'il avait séquestrè et qu'avait 'té analysé par M. Toms, mais que tout était en conformitè ès régliéments: un quart de grain d'Espagne, un quart de fèves moulues, un quart de flieu d'blié; un quart de bran et un quart de moulèe mêlèe d'pétuthe à faithe le pain; reinqu'la maintchi d'l'allouange ordinaithe de sè dans l'beurre; du jaune chucre et d'la m'lasse à confithe la g'lèe; et d'la gâche sans chucre, beurre, graisse, ni flieu d'bouanne qualité à la faithe.

 

Quand Mr. Toms eut certifié l'exactitude de s'n'analyse, Fraink Amin affirmi que ch'tait bein là le mangi que sa femme lis dounnait et que, pour sa part, i' n'avait pas autchune idèe que l'atchusè avait fait une migaud d'chucre en pain.

 

ENTRE-ACTE

 

Le Président dit que l'audience es'sait suspendue jusqu'à deux heuthes et d'mie et nou' z'entendit Moussieu' Trémel d'valler les d'grais d'la Cour au galop pour aller dréchi la tabl'ye pour le Jury.

 

La gall'rie se viedji tout d'un coup; les témoins s'en allidrent avec un grand air d'importance. Les membres du Jury sortidrent les dernièrs, le nouvieau Vicomte, qui jouait occouo machinalement avec san but d'lachette en noeud coulant, allant l'avant avec Teddy Boielle, qu'avait, chose êtrange, 'tè nommè Chef du Jury.

 

I' s'en allidrent don' tous avair un bouan dîner ès frais d'La Couronne, mais mai - j'en ai occouo l'tchoeu gros quand j'y pense. Hélas, Hélas!

 

La pathole d'aniet – Jèrriais word of today

 La pathole d'aniet – Jèrriais word of today: La Rue d'Driéthe - King Street (literally: the road of behind)

Bouônjour à matîn - Good morning

  Bouônjour à matîn - Good morning

1918: Man Crime (1)

 Eune histouaithe par Elie dans l'Almonnas des Chroniques de Jersey 1918 (1é partie):

A story by EJ Luce from the 1918 Almanac of Les Chroniques de Jersey (part 1):

Man Crime

 

L'ENTRÉE EN SCÈNE.

 

"ELIE!"

 

Ch'tait la vouaix du Greff'yi d'la grand' Cour, cliaithe et rapide coumme un êpar de feu.

 

"PRÉSENT"! que j'dis, en trembliottant, et en me l'vant d'bu' un instant, pour me rassiéthe tout d'suite sus man p'tit banc, à bu d'forche et tout êpeuxthè.

 

Ch'tait les Assisses. Toute la Cour 'tait là, et l'Président, dans sa rouoge robe, me faisait trimeu', tant il avait l'air sévéthe.

 

Le Protchuleux me r'gardait à travers ses lunettes. Ses yeux erlisaient coumme des vers-peurs et il avait l'air de s'dithe: "Je l'tcheins et il est bein pathè chutte fais."

 

Le Jury 'tait dans les trais bancs qu'ou' savez. La pus grand' partie avaient des néthes câsaques mais lus mine 'tait occouo pus sombre que lus habits. Touos les siens qui r'gardaient d'man bord me rouolaient des yièrs coumme des souotasses; lus poings 'taient agrippès au d'vant d'lus banc coumme pour les empêchi d's'avoler sus mai pour m'agver sans pus d'cérémonie. Pas un seul n'avait l'air d'être même prêt à êcouter si m'n'Avocat pourrait bétôt dithe tchic chose en ma faveur, ne fût-che que pliaidgi des circonstances atténuantes.

 

Un moment, j'avais quâsi espéthè: Les noms à deux-trais de mes pus vièrs amins avaient 'té appl'ès: Piteur Pain, J.P., Laïesse Ernon, Dan Lêcaudey, Cliément d'Caen, mais quand l'Président eut d'mandè si y'avait des rétchusâtions, le Protchuleux, tout d'un embront, les noummi touos les chinq et dit qu'i' les r'tchûsait "et péremptoirement et pour cause," et touos les chinq fudrent renviès dans la gall'rie, avec un tas d'gens d'mauvaise vie.

 

Les crêpes

 Les crêpes

 

Eune crêpe est en prîncipe eune gâche coutchie sus eune pièrre caûffée, eune câssetrole, ou eune fielle dé méta. Oulle est grée d'eune farce ofûche d'auve d'la flieu, d's oeux et du lait.

 

Y'en a un tas d'difféthentes crêpes partout l'monde, s'lon des r'chettes traditionnelles dé difféthents pays. Les crêpes Jèrriaises sont êpaîsses, auve du frit dans la farce. Les crêpes Brétonnes sont hardi tenvres, coumme d'la dentelle, pus à co grandes épis pliées. Les crêpes Angliaiches sont coumme entre les deux. Nou trouve des crêpes grées atout du l'vain. Et au run d'la flieu y'en a des crêpes grées atout du sarrâsîn ou d'la patate ou d'la flieu d'riz. Les crêpes Êcôssaises sont coumme les Jèrriaises, eune tchullée d'farce laîssie tchée dans eune câssetrole, mais pouor ieux sans frit et auve du lait d'beurre ou du bicarbonate.