1959: Le système honoraire

 Le système honoraire.

Et la natuthe de la bête.

 

Au Portinfé,

Jeudi ai sé.

 

 

Moussieu l'Editeu,

 

Savous bein que chutte semaine j'ai tait forchi par la Merrienne d'ordonné un tônné d'tchérbon, à crédit bein seux, car la vieille a muchi sa cauche, et maintchein que n'ya rain d'dans. Je sais bein que ch'n'est pas la véthité, mais comment l'prouvé? Touos les siers ou s'est pliante d'la fraid et dit que si l'tchérbon est chi, le docteu s'sait ocquo pièthe. Ou m'a d'mandé pûs d'une fais si j'voudrais la vais à l'hopita, et j'ai dit qu'bein seux qu'nânin, mais Moussieu, j'n'en s'y pas tréjous si seux.

 

Oulle a veu dans la gâzette que les Djérnesiais s'en vont dêpensé une ênorme somme pour changi l'iau salée en iau fraiche, et ou veur savé pourtchi faithe chonna quand ch't'année y'a yeu assez d'iau dans lûs grand réservoir pour tout l'monde. Ou qu'menche à craithe que les Djérnesiais ont pérdu la tête et je m'trouve de ch't'opinion-là étout. Mais, comme j'y'ai dit, ch'n'est pas seulement en Djérnezi tch'y font des bêtises.

 

Hier au sé ou s'mint à pâslé du Tourisme, car nou y'avait dit dans l'arlevée qu'en Ville, et surtout parmi les hoteliers y'avait une idée qu'une statue du Président du comité pathaitrait bein dans l'mitan d'la Place Royale, ouèsque dans les viers temps y s'trouvait une epèce de cage pour les malfaiteurs. Je n'voulit pas l'y dithe chein qu'j'en criyais de ch't'idée-là mais je r'mértchit que dans l'île y'avait pûs et pus d'monde pérsuadés que j'avions dêjà assez d'chais touristes.

 

“Mais,” ou s'fit, “j'ai liut qu'un certain moussieu dit à l'Hotel de l'Europe que les férmiers en profitaient, car y pouvaient vendre ès hotels lûs produits. Pourtant, j'n'ai jamais veu un hotelier ichin voulant accaté nos caboches ou nos pais d'mai.”

 

“Nan,” j'l'y dit, “et tu n'en vêrras pas. Pour les caboches je n'sais pas, car y faut tchi veinnent d'la férme ou du marchi, pour le réstant des lédgumes nou pérdrait san temps d'allé lûs en offri, car y veinnent dans les tins. Des pais ronds, par éxemplye, crais-tu que dans l'hotels et les boarding-house y prendraient la peine de s'êcalé?”

 

“J'pense bein qu'nânin,” ou dit, “mais Ph'lip, chein tchi m'gène ch'est d'savé que hardi d'nos jeunes gens, et pas seulement d'la Ville, veulent tchitté l'Ile pour s'en allé en Australie ou tchique autre pays sauvage. J'ai veu tchi y'a en Jêrri un moussieu tch'y dit qu'en Australie un jeune Jêrriais peut faithe sa fortune. Ch'est triste de vais un fils d'férmyi abandonné l'férmage et l'île ouèsqu'il a 'tait né pour allé travaillyi dans un pays tch'y n'connait pas et parmi d's'êtrangiers. Ch'est l'fichu Tourisme tch'en est la cause.”

 

“Y'a une autre chose tch'est pûs importante et tchi n'a rain à faithe avec le Tourisme,” j'l'y dit. “Ch'est chein qu'nous entend de touos les bords, que notre vier système honoraire est en dangi de dispathaître.”

 

“Ch'est du gniolin,” ou s'fit.

 

“Y'a tchique temps j'éthais accordé,” j'l'y dit, “mais au jour d'agniet j'n'en s'y pas si seux. Au Show, à Springfield, je convérsit avec un bouon Jêrriais tch'est dans l's'Etats, et chein tch'y m'dit fit une grande impréssion.”

 

“Y dit que dans toutes les pâraisses de Campagne y y'avait des jeunes garçons de bouonnes familles jêrriaises, tch'y s'saient contents de joindre la police s'y pouvaient craithe que tchique jour y pouôrraient s'trouvé dans un poste résponsablye, mais tch'y savaient tch'ils éthaient à attendre bein d's'années parsque l's'hommes en poste ne voulaient jamais s'r'tithé. Y'a longtemps qu'j'ai veu chonna et si j'voulons gardé notre système intacte, je s'y en faveur de fixé une limite au nombre d'années qu'un Connétablye par éxemplye, peut resté en office. Neuf ans, y m'semblye, s'sait raisonnablye. Chonna donn'nait ès pûs jeunes une chance de monté pûs haut.”

 

“J'n'en approuve pas du-tout de ch't'idée-là,” ou dit. “Quand nous a un Connétablye tch'y fait sa djobbe comme-y-faut, nou dait l'gardé aussi longtemps comme nou peut. Nous a tréjous fait chonna et che s'sait une grande mêprinse de changi tandis que y'a pas d'folles dêpenses et que l'rât n'hauche pas.”

 

“Eh bein, ma vieille,” j'l'y dit, “tu'as t'n'opinion et mé j'ai la ménne, et j'n'éthions pas d'brit. Ach'teu tu'as veu étout la longue histouaithe dans la Post au sujét des A'Courts et des Cârrés.”

 

“Vèthe,” ou dit, “et peux-tu m'dithe pourtchi qu'chais deux familles-là n'peuvent jamais s'accordé? Y semblye que n'y'a pas assez d'run dans la pâraisse pour les deux.”

 

“Nous a veu chonna d'vant,” j'l'y dit. “Quand j'tais mousse, par éxemplye, y' avait deux femmes mathiées pas lien du Magni d'Saint-Ou, tch'y n'pouvaient pas s'entre rencontré sans s'entre capuchi. Ch'tait un vrai scandal et à la fin ils en eutes toutes les deux un mais d'prîson.”

 

“Et sans doute chonna lûs apprint une leçon?”

 

“Pas du tout,” j'l'y dit, “mais heutheusement yunne se rompit l'co en d'valant les d'grès. Ch'est la natuthe de la bête, Merrienne, et chonna nou n'peut pas changi.”

 

Ph'lip.

1959