1959: Rapport dé la rêunion du mais d'Août

 L'Assembliée d'Jèrriais

Rapport dé la rêunion du mais d'Août.

 

La rêunion mensuelle eut lieu Vendrédi, l' 21 d'Août, dans la Salle Parouaîssiale dé St. Louothains, et i'y avait passant 50 membres présents.

 

Les rapports des trais dreins mais fûdrent lius, et i' fûdrent acceptés à l'unanimité, et eune nouvelle membre fut êlue. (La raison qu'i'y avait trais rapports 'tait viyant qué au mains d'Juin ch'fut l'Service Annuel et au mais d'Juillet, i'y eut l'Excursion).

 

Le Président fit tchiques annonces et auprès, mînt l'restant d'la séthée dans les mains du Conmité Dramatique, auve lé Sieur G. Le Masurier en cherge.

 

Ch'fut eune séthée tout à fait diféthante qué d'habitude, lé Sieur Le Masurier d'mandant es siens qu'avaient un “motor” dé trouver des passagièrs et un coup chenn'chin arrangi, le “chauffeux” fut donné eune env'lope auve eune liste d'objets qué fallait qué chaque dgaingue tâchîsse dé trouver. Y'en avait dé pus d'eune sorte à cherchi! Par exemplye - Eune pathe dé braies à plíatchet - Un baîni (à la mer haute!) Mais yen avait qu'en trouvitent quand même. - Un pipot d'canibottes - d'la canmiéthe - un parasol, - en êffet un vrai assortiment... Lé temps 'tait limité, et fallait ervénin à 9 heuthes et d'mie ou perdre des points. Quand vînt l'heuthe, les gens r'arrivaient - Un homme dé d'dans chaque vétuthe en habits d'niet et portant eune danme en d'vanté d'pouque, eune capotte et portant eune canne à traithe. Ch'tait bein amusant... Les siens qu'avaient l'pus d'points fûdrent rêcompensés avec dé p'tits cadeaux et Mme. F. Hacquoil eut la bonté d'les présenter.

 

Lé Sieur Le Masurier ermercyit l'Sieur G. Perchard et sa danme pour aver prîns la peine dé faithe la liste d'objets.

 

Lé Conmité Dramatique qu'avaient apporté du café et des gallettes en servîdrent ès gens.

 

A la fin lé Sieur Billot emercyit l'Connêtablye dé St. Louothains pour l'usage dé la Salle et l'Conmité Dramatique pour aver arrangi la séthée et annoncit la Rêunion Générale Annuelle pour Vendrédi l' 25 dé Septembre.

 

Le portrait qu'avait 'té prîns en France 'tait en veue pour les gens à vaie, et il y s'sa encore à la préchaine rêunion pour la dreine fais, pour donner la chance ès gens qui veulent en ordonner iun.

 

1959