1959: Ph'lip et la Milice

 Ph'lip et la Milice.

Y pense ès bouons viers temps.

 

Au Portinfé,

Jeudi au sé,

 

Moussieu l'Editeu,

 

Chu temps ichin ne vos va pas, ni à mé, ni à la Merrienne. Tout est mucre, tout est mouoillé, et j'n'avons pas veu l'solé pour dithe pour trais jours. Y n'y'a pas à dithe, j'avons l's'ésprits bas, et j'trouvons la vie bein péniblye. Pour agvé tout, les fichues poules ne nos ont pas donné un seul oeu pour bétôt une s'maine. Y restent le long des jours accroupies dans une cârre du poulaillyi, et même le vier coq pathait avé abandonné l'affaithe. Est-che tch'il a trop d'femmes ou tchi n'en a pas asséz, je n'sais vraiement pas, mais j'l'ai dgérni que s'y n'donne pas signe de vie d'vant long, il êtha ouèsque touos les coqs, bouons ou mauvais, vont tchique jour.

 

La Merrienne liét la gâzétte touos les siers, comme de couôtume, et asêsé, après avé fini, ou m'a d'mandé si j'criyais que l'projét d'notre Député, le Majeur de Gruchy, a autchune chance de pâssé. “Y veur résuscité la vieille milice,” oulle a dit, “et par chein qu'j'en vais, l's'Etats ont décidé de distchuté l'projet. Chonna m'êtonne asséz, car j'éthais creu tch'y l'éthaient envié au royaume des taupes tout'd'suite.”

 

“Et pourtchi chonna?” j'y'ai d'mandé. “Quant à mé j'éspèthe que l'Mâjeur réussitha. As-tu oublié les viers temps quand la Compagnie d'Saint-Ou allait à l'Arsenal de Saint-Piêrre pour lûs drill, à Crabbé pour tithe au bianc, ès Blianches Banques pour les Inspéctions, et sûs la grève pour la Grande R'veue. Mé, j'tais carpotha dans les nonantes, et quand j'dêshallais avec ma rouoge câsaque, mes deux stripes sûs l'bras gauche, et mes bottes bein bliétchinées, y n'avait ni femme ni fille tch'y n'se dêtouonait pas quand j'avais pâssé. Bouffle! mais j'tais biau garçon dans chu temps-là, et quand j'allions tithé au blianc il en fallait un bouon à m'battre à une gamme de nap.”

 

“J'tais là étout,” j'ai continué, “le fameux jour d'la Grand' R'veue quant la Compagnie r'fûsit d'obéï l'ordre de quick march, de tchi qu'y'eut un sergent ou deux tch'en attrapîtes pour un mais ou d'même en cage. Ch'tait l'Colonel James Le Brun tch'y donnit l'ordre, mais il éthait deu savé mûs, car la Compagnie de Saint-Ou, 'tait numétho yun et nos garçons s'en allaient pas marchi d'l'autre but d'la ligne. J'tais mousse dans l'temps, et trop jeune pour être ocquo dans la milice, mais j'me r'souveins d'chu jour-là comme si ch'avait 'tait hier. Pûs tard, j'apprint à faithe form fours et by the right quick march, et sans autchune doute j'éthais fini sérgent ou même sérgent-mâjeur si j'n'avais pas 'tait bête asséz de m'mathié.”

 

“Oh!” ou s'est faite, “et pourtant tu à mé d'mandé au mains une demié-doûzaine d'fais d'vant chutte séthée-là quand j'fut bête asséz de dithe oui. Tu n'pensais pas à la Milice chutte séthée-là, et tu me t'nais si raide que j'n'eut que d'm'êtouffé! Mais, badinage à part, Ph'lip, as-tu veu que l'Comité d'Agritcultuthe veulent ach'teu pérméttre l'introduction d'une certaine variêté d'patates irlandaises, et chonna après tch'ils avaient décidé contre autchunes patates sinon notre vieille Royale? Tchèsque chonna veur dithe?”

 

J'ai yeu à souorithe. “La raison en est, Merrienne,” j'y'ai dit, “que l'Comité a dêcouvért que y'en a dêjà dans l'Ile bein des tonniaux d'chutte variêté-là, et y faut adméttre étout qu'oulle est bein eûsive, pûs eûsive, y'en a tch'y dîsent, que la Royale. Mais ch'n'est pas ocquo décidé, et ch'est seux et cértain que y'étha une longue distchussion et étout d'l'oppôsition. Ch'n'est pas fini.”

 

“Le Sénateur Jack Le Mérquand,” oulle a r'mértchi, “voudrait donné entrée libre à autchune sorte d'patates. J'trouve chonna bein drôle-mé, car le Sieur Le Mérquand est fermyi et dait savé que si par chance l's'Etats approuvaient de s'n'idée che s'sait dithe à-bétôt à la Royale.”

 

“Bein seux,” j'y'ai dit, “mais ne t'gène pas, Merrienne. Les Etats n'sont pas sans savé que l'Sénateur n'a jamais 'tait chein qu'nou peut app'lé un bouon fermyi et y n'le prendront pas sérieusement chutte fais. Je crais qu'j'îthai ès Etats quand l'jour veindra, car, sans doute, y'étha du feu d'satchi. J'ai même idée du prendre une chambre en Ville pour un mais ou deux, car dans la liste d'sujéts que j'n'avons pas mentionné, y'en a plusieurs tchi m'intéressent hardi, et y y'a un tel but d'ichin.”

 

“Une raide bouonne idée,” ou s'est faite, “et sans doute tu m'prendras ôv té.”

 

“Et tchèsqu-y soign'na d'la maison et de tout l'réstant?” j'ai d'mandé.

 

“Je n'sais pas,” oulle a raiponnu, “mais bein seux que ch'ne s'sa pas mé!”

 

Ph'lip.

1959