1959: L'Assembliée d'Jèrriais

 L'Assembliée d'Jèrriais

Rêunion Mensuelle du Mais d'Avri.

 

D'vant c'menchi l's'affaithes pour la séthée, l'Président payit un tribut à not' preumié Président d'l'Assembliée et après iun des Présidents d'Honneu, le Juge H. Le Riche Edwards. Nous avait liut les tristes nouvelles dé san décès pus euthe dans la s'maine, et l'Sieur Billot dit comment qu' Moussieu Edwards avait tréjous fait san possiblye pour l'Assembliée et bieau qu'il avait 'té malade pour tchique temps, il avait tréjous gardé intéthêt dans l's'affaithes qui s'passaient. Les membres lus l'vitent eune minute en silence à sa mémouaithe.

 

Duthant l'couothant d's'affaithes, qui fudrent gardés courtes, i'y eu deux nouvieaux membres d'êlus.

 

Annonces.

 

Lé Président annoncit la préchaine rêunion pour lé 29 dé Mai, au Châté d'Mont Orgeuil, à 8 heuthes du sé, et l'Service Annuel à la Chapelle Méthodiste dé Sion, lé 28 dé Juin, à 3 heuthes d'l'arlevée. Auprès chenn-chin, l'Sieur Billot mînt l's'affaithes dans les mains du Sieur G. Le Masurier, Président du Conmité Dramatique.

 

Divèrtissements.

 

La preumièthe chose 'tait un débat: “Tchi vaut mus, être né contents ou intélligents?”

 

Mme. Lucille Renouf et l'Chentinyi Le Breton êprouvîdrent à convaincre les gens qu'i'valait bein mus être nés intélligents, mais Mlle. H. de Veuille et l'Sieur H. M. Gibaut fîdrent hardi bein pour les convaincre qué ch'tait l's'intélligents qui 'taient en cherge de la majorité des choses et qué ch'tait ieux qui faisaient toutes les bêtises et qué valait bein amusant! Mais en fin d'conte, est-che qui n'vaut pon encore bein mus être les deux; contents et intélligents!

 

Auprès l'débat, i' yeu un “Tchestionaithe” entouor Jêrri et l'Jèrriais. Mme. P. Green, lé Sieur C. P. Billot et l'Sieur F. Noël prindrent part contre Mme. E. Vibert et les Mêssieux G. Pallot et H. Taunton. Ch'fut bein întérêssant, i'n'savaient pon toutes les rêponses, mais ch'est êtonnant combein qu'i'y avait d'gens présents qui n'les savaient pon n'tou. La dreine compétition, quand n'fallait pon dithe “Oui-nannin-ni non,” fut bein applaudie, et touos les siens qu'y prindrent part méthitent d'être félicités, mais sustout l'Sieur Garnet Perchard, qui méthite des félicitations spéciales, pour d'mander les tchestions si-bein. I'y est vraiement [f]anmeux.

 

1959