1959: La bordee d'nièr beurre

 L'Assembliée d'Jèrriais

La bordee d'nièr beurre

 

Pour la preunmié fais dépis qu'L'Assembliée a 'tait fondée, lé Conmité Exétchutif, sous la présidence du Sieur H. M. Gibaut, ont arrangi eune Séthée d'Nièr Beurre.

 

Mais ch'n'est pon seul'ment d'la séthée qu'faut penser! ch'ait l's arrangements et immenses prépathatifs, qu'i'y avait à faithe dévant. Preunmiéth'ment, fallait trouver les pommes, lé cidre, etc., et, bein important, eune pliaiche grande assez et conv'nablye pour acc'moder lé grand nombre de membres qui 'taient touos si prêts à aidgi à faithe lé travas, et auprès de jouaindre dans l'révillon et amusement. Ch'fut eune grande entréprinse, mais auprès qu'les preunmiéthes diffitchultées fûdrent surmontées, l'affaithe marchi comme sus roulette!

 

Comme ch'n'allait être eune occasion unique dans l's annales de L'Assembliée, i' fut décidé dé prendre un “film” pour l'aver comme un r'cord pour lé temps à v'nin. Les preunmièrs portraits fûdrent prins à la tchil'lie d'pommes à la fin d'octobre, siez l'Chentn'yi Henry Le Feuvre; auprès i'y n eut d'autres de prins quand l'cidre fut fait siez l'Sieur Le Cornu, à St. Louothains étout.

 

Eune autre grande bordée fut quand Mme. W. Robert cauffi l'grand fou ès Hêtres à St. Pierre; ichin plusieurs des danmes fûdrent li donner un coup d'main à faithe des bourdélots, du pâté, d'la galette à vraic et touos les vièrs fricots du temps passé pour servi lé jour du nièr beurre.

 

Dans l'entrétemps que les femmes 'taient à tchuithe lé mangi, les hommes 'taient à Springfield à mettre tout près là.

 

Mais enfin, un coup touos les prépathatifs fais, le travas du nièr beurre même c'menchit l' mêcrédi l'arlévée, dé vièrs deux heuthes et d'mie.

 

Mme. Gibaut 'tait en chèrge des rafraîchissements pour lé jour, et passit eune tassée d'thée et eune bouochie dans les quatre heuthes, et pis à sept heuthes, quand i'n' restait qué tchiques pommes à p'ler, les siens qui 'taient acouo en travas fudrent servis d'un magnifique fricot d'pais au fou avec du piot.

 

Quand vint huit heuthes fallit mettre lé cidre à cauffer. Les siens en chèrge, les mêssieux D. de la Haye et G. Le Masurier, appréhendaient un miot, car ch'tait la preunmié fais qué du nièr beurre feûsse tchui sus l' “gaz.”

 

Un coup que l'cidre bouollit fallait l'laissi molli par la maintchi au mains et auprès, ajouôter les pommes, un mio à la fais, les limons, lé ricolisse et l'chucre.

 

Duthant l'couothant d'la niet plusieurs des hommes prindrent tou à mouer, et deux des danmes restitent à lus faithe du thée et lus donner à mangi.

 

Duthant l'arlévée L'Assembliée fut honoré d'aver l'Gouverneux et sa danme à lus payer eune visite. Quand l'Général Erskine et sa danme arrivitent, lé président, sa danme et les membres du Conmité 'taient dans l'allée à les r'chever, et Moussieu et Mme Gibaut lus montritent la vieille tchuisine, mais ch'tait la pêle et l'nièr beurre qu'attrayait les visiteurs, et bieau qu'les épisses n'avez pon acouo 'tait minses l'd'manditent pouor en gouoter. Auprès aver pasler à la pus grand partie des membres présents, Mme. Richard lus servi du thée dans la vieille tchuisine. I'y avait des mèrvelles, des bourdélots et d'la gâche dé pâte et chen'chin lus pliut hardi. En effet la visite en entchi fut un grand succès, et en lus en r'allant lé Gouvèrneux et sa danme ditent tchi pliaisi qué v'la tchi lus avait fait d'être venus.

 

Dé vièrs sept heuthes la salle s'empliait et, à sept heuthes et d'mie la rêunion menseulle eut lieu. L's affaithes fûdrent copées d'court pour sauver l'temps et chinq nouvieaux membres fûdrent êlus.

 

A un quart de huit la pêle fut hallée de s'sus l'feu. Mlle. Le Boutillier mint l's épisses dédans tandis qu'les hommes rémouaient acouo. Auprès chenn'chin l'nièr beurre fut dréchi dans des bros et des têrrinnes, à r'fraidgi d'vant qu'être mins dans des pots d'eune livre.

 

Eune douzaine des fommes aidgirent à faithe chenn'chin et dans l'mitan d'la salle lé Conmité Dramatique, souos l'Sieur Gtn. Perchard et sa danme 'taient à arrangi des danses, des chansons, du révillon et d'l'amus'ment pour les siens qui s'étaient assis à l'entou à r'garder ou à joindre dan l'ji, et à chu moment y en avait envithon 300 personnes.

 

Quand les gens sûdrent qu'i' pouvez acater l'nièr beurre i' lus avolitent comme des freunmions sus eune pottée dé g'lée, et dans rein d'temps quâsi 300 pottées fûdrent vendues.

 

Suivit eune compétition pour l'habit l'pus originel du temps passé, car tout l'travers de la bordée la majorité des membres 'taient dans d'bieaux vièrs habits - ch'est seux que y avait ieu du fouillage dans les fréminnes!

 

Finalement, dé vièrs onze heuthes, les musiciens qu'avaient 'tait à jouer toute la séthée lus mintent à jouer “Pour l'amour du vièr temps,” et tous joinidrent à chanter “La Reine.”

 

Le Sieur C. P. Billot (ex-président), en tchique patholes bein chouaisies, félicitit l'Sieur Gibaut et sa danme et les siens qui lus avaient aidgi pour faithe un té succès d'eune si grande entréprinse et, auprès, l'président èrmèrcyit les siens qu'avaient donné du mangi, des pommes - enfin touos les siens qu'avaient aidgi sus autchun sens - et dit qué ch'tait impossiblye dé mentionner d'noms car i'y en avait tant qui l'avaient supporté tout l'travers.

 

Touos les membres qui fûdrent à Springfield en autchun temps disent la même chose: “Tchi bouan temps qu'nous a ieu tous ensemblye.” Félicitations, Moussieu et Mme. Gibaut.

 

N'oublyis pon la préchaine rêunion mensuelle, dans la Salle Parouaissiale dé St. Brélade, samedi, l' 19 dé décembre.

 

1959