1918: Man Crime (3)

(siette et fîn)

LE RÉSUMÉ DU PRÉSIDENT

 

Quand l'huissier eut portè un tas d'actes, de régliément et d'autres dotchuments au Président, et que deux-trais des membres du Jury qui pathaissaient enn'yés se fudrent crainchis un mio, le Président s'mins à d'viser. Le Jury qu'avait ergardè à gauche tout l'temps qu'l'Avocat pâlait, ergardit drait endrait li.

 

"Man d'vair, fit l'Président, ch'est d'rêsumer les débats, de mettre les points sur les I et d'rappeler le Jury au sens d'la gravitè d'la cause. Mais l'affaithe est si cliaithe, que j'n'en ai que pour deux minutes..."

 

Par chu temps-là, la tête me touannait, les ouothelles me cônaient, mes yeux 'taient touos embrouoillis. Je n'discèrnais pus dghéthe chein qui s'passait l'tou' d'mai. Je m'renvèrtchi sus man banc, j'frumi les yièrs et j'attendi. Sans m'êvanni tout à fait, j'tais réellement hors de connaissance.

 

LE VERDICT

 

Combien d'temps que j'fu' d'même, je n'le sai' pas, mais quand je r'prins un mio mes sens, le Jury v'nait d'rentrer. Teddy Boielle le chef, 'tait d'bu. I' disait, dans une vouaix d'entrepreneux d'enterrement:

 

LE JURY EST UNANIME: L'ATCHUSÈ EST COUPABL'YE SUS TOUOS LES CHEFS DE L'ATCHUSATION!

 

"Pouorre Elie, qu'il ajouôti, tristement en me r'gardant, pouorre vier..." et i' se laissi tchaie dans sa plièche en briyant coumme un âne.

 

Le portrait de Teddy à plieuther d'chagrin me touchi. Jusqu-la j'avais t'nu bon, mais san visage attristrè et les lèmes qui lis ruiss'laient avau l'nez fudrent trop pour mai. J'm'êgouffi à plieuther ètou. J'm'engrouti coumme un mousse, sans m'gêner d'appathence ou de dignité. Y'a des moments dans la vie que l'tchoeu gouverne la tête... Oprès chenna, j'viyais sans discèrner, j'ouïais sans comprendre.

 

Le Protchuleux se l'vit et d'mandi tchicque chose; l'Avocat pâli longtemps d'une vouaix triste et sans espéthance; les Juges fidrent tous un p'tit signe de tête pour dithe que "oui," le Président prononci des mots de tchi que j'n'en entendais pas la maintchi. Le Vicomte jouait occouo ov san bu d'lachette en noeud coulant...

 

Les expressions "pendu jusqu'à ce que la mort s'ensuive," "hart au co," "touos ses héthitages forfaits à la Couronne" me bourdonnaient dans l's'ouotheilles, sans que j'susse au juste de yoù qu'i' prov'naient.

 

DÉNOUEMENT

 

Le Président carri ses livres et l'vit l'vitchet d'san "dex." Il en dehalli un nièr bounnet, qu'avait une forte odeur de moési.

 

Je m'doutais bein, hélas! de chein que v'là qui signifiait...

 

Le Président se l'vit. Tout l'monde se tut, même les femmes qu'étaient à cacq'ter entre haut et bas dans la gall'rie. I' s'fit un si grand silence que nou-z'éthait peu ouï une souothis couorre - si des souothis pouvaient vivre là ou'est qu'les hoummes d'affaithe ont pliutchi depis des généthâtions, nous sentait bein qu'i' s'n'allait s'passer tchicque chose de hors du commun. L'air était pesant, surchèrgi coumme devant une grand' catastophe qui s'en va tchaie sus l'monde et êcraser les gens. Ch'tait à peine si nou pouvait respither.

 

Tout d'un coup, justement quand l'Président s'n'allait mettre le nièr bounnet sus sa tête, il arrêti, la main l'vèe. Ses yeux s'ouvridrent touos grands, à maintchi errès, sa fache touanni blianche coumme un suaithe; ses mains s'mindrent à trembliotter. Il avait le r'gard fixé sus la tabl'ye du Greff'yi, la grand' tabl'ye yoù qu'ils ont habitude de mettre les piéches de conviction, les objets volès et les articl'yes qu'ont 'té la cause des poursuites.

 

"Moussieu l'Greff'yi, s'fit l'Président d'une vouaix toute changie, où'est qu'est la piéche de conviction?"

 

San daigt pointait à la tabl'ye.

 

Le lopin d'chucre en pain qu'avait 'té là d'pis l'c'mench'ment d'la cause avait sibitement dispathu!!

 

Le Greff'yi resti à r'garder sa tabl'ye sans dithe un mot un instant et pis i' passi sa main sus ses yeux, coumme pour cachi une obre, et s'baissant sus sa tabl'ye i' tâtonni partout d'sus avec ses daigts coumme un aveugl'ye qu'est à cherchi pour un sou... REIN, ni d'sus, ni d'sous, ni alentou!

 

Les Juges, les reporters, le Jury, l'Avocat, les Êcrivains en herbe, les Chantgnièrs, l'huissier, les policemen, le public dans la gall'rie, tout l'monde, enfin, avaient les yièrs sus la tabl'ye. Nan, n'y'avait rein d'sus!!

 

Tout d'un couop, ch'fut une avalanche de monde qui s'ruaient dans le d'vant d'la Cour. Persounne n'êprouvi à l's'arrêter. Toutes les sortes d'gens arrividrent de touos les bords alentou d'la tabl'ye du Greff'yi, p'tits et grands, riches et pauvres, savants et ignouothants, dans un cl'yin d'yi, coumme un fliotchet de poulets alentou d'une pouagnie d'grain dans une carre du poulaill'yi.

 

"Le chucre? le chucre? yoù qu'est l'lopin d'chucre en pain?" nou ouïait crier de toutes parts.

 

"Tch'est qu'en est dev'nu? Tch'est qui l'a prins? Pourtchi qu'il est hors?" chatchun se d'mandait.

 

Y'eut du d'vis, des murmuthes, des atchusâtions, des dénégâtions. Les uns touannidrent lus pautes à l'envers, d'autres tâtidrent dans les siennes à lus vaisins. L'air s'êcauffi, le paivre monti au nez. Un p'tit houmme en insulti un grand. Y'eut une giffe, une boustchulade, des hauts cris, et, sans dithe bouffe ni baffe, ne v'la la bastaude qui d'veint générale. Les bras allaient coumme des aubes de moulin à vent, les casaques trillaient, les pis capuchaient. La poussiéthe se l'vit coumme un nuage partoute la Cour.

 

Prins d'une peux mortelle je m'sauvi du bord d'la porte. Le tintamarre 'tait piéthe que jamais. Le Chantgn'yi Gallichan m'aperchut, i' s'en vint galopant sounet mai. Une main m'happi par l'êpaule...

 

"Lève-tai, pièrcheux," s'faisait ma femme. Le déjeuner est prêt...

 

"Ch'tait un rêve."

 

Elie

Almanach des Chroniques de Jersey 1918