1931: Ch'n'est pas souvent que j'avons l'honneur de vaie notre amin Laiesse Ernon

 Ch'n'est pas souvent que j'avons l'honneur de vaie notre amin Laiesse Ernon dans not'e bureau.

 

Ch'est un homme qu'a hardi d'travas à faithe siez-li et i'vaint en ville à de bain rares occasions. La “bus” du J.M.T. passe au but d'sa cache et Râchelle, sa femme, en prend avantage pour venin faithe ses commissions touos les Samedis, laissant s'n homme à la maison à souogni des bêtes et survillyi tout san travas.

 

Mais l'aut'e jour, Laiesse li-même vint nos payi une visite.

 

Dès qu'il entri je nos aperchûmes bain que tchiquechose l'avait contrarié. Il 'tait bain pus sérieux qu'd'habitude, chein qu'i' fit le Chef li d'mander si y avait tchiquechose qui n'allait pas bain.

 

“Oh!” qu'i' dit, “tout va bain avec mé, sus un sens, mais je sis v'nu vos dithe que quand j'vivrais oquo chinquante ans, jamais j'ne r'servithai sus un Jury!”

 

“Et pourtchi don man pouore Mess Ernon? ou n'avez pas oquo atteint l'âge pour pouver être exempté! Ous avez à peine chinquante ans, ou pouvez être appelé pour oquo djaix ans au mains.”

 

“J'aithai chinquante-deux ans le quatorze Septembre tchi vaint,” se fit Laiesse, mais ch'est une tchestion d'principe. J'ai servi sus l'Jury sept ou huit fais duthant ma vie, mais jamais je n'avait 'té ramassé comme je fus l'aut'e jour. Les aut'es fais quand i' y avait une cause importante ch'tait un p'tit holiday pour nous. Une partie d'la matinée était consacrée à la formation du Jury, à entendre les siens qu'avaient tchique extchuse pour ne pas servi, considéther les calanges de la Partie Publique et de l'Avocat pour la d'fense et ainsi d'suite. Quand tout chenna était fini nous assermentait les têmoins et nous en entendait iun ou deux des prumiers. Les gros Messieux avaient tréjous l'yi sus l'enlouoge et quand v'nait un quart de iune la Cour ajournait pour aller luntchi et nous s'rendait à l'Hôtel de l'Europe ou ailleurs, souos la garde du Vicomte, et nous était régalés d'un r'pas superbe qui vos mettait en trime pour erquemenchi à deux heuthes et d'mie. Ch'tait un pliaîsi que d'être membre du Jury souos des circonstances comme chenna.

 

Mais l'aut'e jour, tch'est qui s'arrivi? Tout l'bisnesse fut expédié dans la matinée, sans même une intervalle pour aller baithe une fais, et mê qu'avais la gorge comme une râpe et qu'aithais bailli un chelin pour une malheutheuse bouteille de “Mary Ann.”

 

Mais i' n'y avait rain à faithe. Fallait bain dauber.

 

Têmoignages, discours de Partie Publique, de l'Avocat pour la d'fense, résumé du Bailli, tout s'entre suivi sans la moindre rélâche et un Jury de vingt-quatre hommes affamés se r'tithi pour dêlibéther et arriver à un verdict.

 

Comment qu'nou peut s'attendre qu'une tchestion peut être abordée “à tête reposée” quand nous a l'ventre viède?

 

Je n'peux pas mé tréjous, et pour mettre la chose oquo pièthe, la Râchelle m'avait laissi déjeuner qu'à maintchi en m'disant qu'i' n'fallait pas mangi trop pour ne pas gâter m'n appétit pour le bouan dîner que j'nos allions aver à l'Hôtel. Comme le pouore imbécile que j'étais je partageais ses veues ettou mé.

 

Ou pouvez don vos rendre compte de mes sentiments quand j'vi la cause finie à une heuthe et d'mie et que tout ch'que j'avions pour nos remplyi la bédaine étaient les r'merciements du Président.

 

Je m'appréchi du foremaine et j'li d'mandi.

 

“I' n'est pas tchestion d'un “feed” don?”

 

“I' n'y en a pas autchun signe,” i' m'raîponni, “Je n'crai pas que l'Vicomte a r'chu autchune instructions à chu sujet-là!”

 

Deustrais d'mes collègues s'en furent siez Mrs. Cooms ordonner une “steak” et j'tais quâsi à même d'en faithe autant ettou mé, mais j'aithais ieu à payi pour man dîner d'ma pouchette et pis quand-même j'aithais mantchi ma “bus”.

 

Ch'est pourtchi je m'en fus siez-nous et man dîner d'Assise était composé d'un morcé d'lard fraid et des patates.

 

“Mais Mess Ernon,” hasardi l'Chef, “i' y a ieu tant d'critiques à ches dernyi quant au gaspillage des deniers publics que peut-être que nos Messieux veulent quemenchi à êconomiser un mio.”

 

“Êconomiser?” s'écriyi Laiesse, “et comment qu'ous explitchiz le fait que l'jour de la Visite Royale dans not'e pârasse, je rencontri l'vier Clément d'Caen, qu'était iun des “voyeurs,” qui s'en r'venait siez-li à chinq heuthes du sé, pliain comme un oeu, et qui s'vantait qu'ils avaient ieu un dîner magnifique, ouest qu'i' n'mantchait d'rain?”

 

Le Chef barbelotti tchiquechose entouor une ancienne couôtume et je n'sais tchi, mais i' n'pu pas apaisi la mârisson du sieur Ernon.

 

“Arrive tchi pliante!” se fit-i', “jamais je ne r'servithai sus un Jury, et je m'en vais dès à saissé siez l'Connaîtablye li c'mander de rayer man nom de sus la liste.”

 

Si ch'est qu'i' r'fuse et que je sis rappelé je f'thai comme i' y en a d'autres qui font, je dithai au Bailli que je n'comprends pas l'français.

 

Caouain

1931