J'nos 'nallons pour Terr'neuve

Né v'chîn l'texte d'aniet d'not' auteu du mais, Jean Sullivan:

Here's today's text by our author of the month, Jean Sullivan:

J'nos 'nallons pour Terr'neuve

J'nos'nallons pour Terr'neuve,
C'hest nouot paii d'Esden,
J'vos en dounnai la preuve.
J'en sis soeux et certain.
Pour li man coeu soupire!
Oh man biau p'tit paiis,
Je t'adouor', je t'admire,
Pus même que Gerry.

Je quittons la Corbière
Dans nouot bouan "vier Cheva" *
J'avons du p'tun, d'la bière.
D'siès l'vaisin Jean Duva.
Et duthant tout l'passage,
J'dansons, j'p'tunnons, j'bévons,
J'grimpons amont l'riggage,
Pour vais si j'arrivons.

Dans nouot bouan vier navire,
Oh, qu'nouz'yiest bain heusroeux,
Nou n'craint pon qui chavire,
I va com' un stiesmoeux.
Et pis san bouan cap'taine
Le tient par san bridot,
I le cache, i le mène
Au fin feu de galot.

Oh! quand j'viyons la terre,
Que je sommes j'ioyioeux!
Au fichard l'Anglieterre,
Viv' le Run des pesquoeux.
Nou z'y vit sans contrainte,
Comme des viers garçons,
Sans souci ni sans crainte,
Libres com' des paissons.

Chascun de nous s'appreste,
A se d'semberqui d'main;
Ah! que je f'rons touos fèste
D'hommards et de podin.
Oh! ma douoche neuve-terre,
Je sis tout excitai,
Je bérai z'un grand verre
A ta prospéritai.

Oh, nos v'la z'à la couoste;
Bouan jeu, Mrs. Vaudin,
Vos y v'lo z'à vouot pouoste
Dans vouot biau grand gardin.
Avous mins la chausguière?
I fait fraid, je tremblions,
Fait' feu dans la cosgnière
Pour que j'nos y cauffions.

Gieu merci j'som's à terre,
Oh, que je sis heusroeux!
Eh, bévons un p'tit verre,
Man chier Maît Ph'lip Le Suoeux,
Que la liqueur est bouanne,
Quand nou la bait siès sé;
Dans chu paiis d'cocagne,
J'en f'rai feste assessé.

A Gui z'à l'Anglieterre,
Je sis ichin siès mé,
Je jure g'nou zen terre,
De vivre sus sa mé.
I gnia pon dans le monde,
Un coin ossi r'cherchi,
Bévons oquo z'un ronde,
Et allons nos couochi.