Eslegie sus la mort du Juge Langlois, Juin 19, 1884

Né v'chîn l'texte d'aniet d'not' auteu du mais, Jean Sullivan:

Here's today's text by our author of the month, Jean Sullivan:

Eslegie sus la mort du Juge Langlois, Juin 19, 1884

Yun de nouos viers rimeurs, yun de nouot viel' escole,
Pass' de vie à trespas...
Ovec ses bouans ammins nou l'plieure et nou condole,
Car i n'rescrira pas.

Il aimmait l'bouan Gerriais, ch'tait san pus chier idiôme,
(Ov li je l'parlochais)
I l'paslait ès Estats - i l'dvisait dans san home,
En raid' Saint-Louorachais!

Es Estats, à la Cour, il 'tait pour la Justice,
I n'avait pon d'ammins.
I lus baillait fair pliay, i lus donnait notice,
Qui n'avait pas d'enmins.

Il 'tait bouan astronome, et bein grand antiquaire;
Ch'tait un grand historien;
I d'visait des biautais du Ciel et de la terre,
En vrai Grégorien.

Pour nouot Constitution et nouotre autonomie,
I l'saimmait com' ses zyers;
Newton, Herschell, Fitzroy et lus astronomie,
I les chantait en vers.

C'hétait l'Docteu du pauvre: il 'tait pour le malade
Un vrai consolateu!
I les souongnait pour rain; méd'cine et marmelade,
'Tait ès frais du Docteu.

Gerry, gravons san nom ès fieillets de l'histouaire,
Ch'tait yun d'tes bouans esfants,
Qui nos sait en exemple, ayons-nen la mémouaire,
Dans nos vers, dans nos chants!