Un mot à la Capelle de noutre Dom'-des-Pas

Né v'chîn l'texte d'aniet d'not' auteu du mais, Jean Sullivan:

Here's today's text by our author of the month, Jean Sullivan:

Un mot à la Capelle de noutre Dom'-des-Pas

Oh, si javais 'tai là, tuexisterais oquore,
Nouoble vier monuesment!
Tu fut basti bein d'saeux, quand Gerry tait bein poore,
J'en jure et pon n'en ment.

Nou dit que nouotre Dom', la bouan' et sainte Vierge,
V'nait souvent à t'n Austet,
Ovec sa robe blianch', tenant en main un cierge -
Eun' Ange à san costait!

Oh, si j'avais 'tai là, j'lyérais dit, Sainte Mère,
Assommais les forbans,
Qui zovec lus piquois, sont là dans nouot chimquière,
Pour dépichir nos bancs.

Oh, quand j'étais tout p'tit, en m'promnant ov m'en père,
D'viers le Havre des pas;
J'allions à tan roquir, im'contait ten histouaire,
En me montrant tes Pas.

Man cher Père en vermait, - disait: "qui sacrilège,"
(Car il 'tait antiquoeux)
Fallait la garder d'but, y bastir un Collège,
Pour nos poors histouthioeux.

Gerry zétait bein riche en viers Austets de pierre,
En menhirs, en dolmans;
Nou zen viyait partout - i sont touos en poussière,
Ches biaux chiers monuesmens.

Nou trouvit un matin, souos nouot mont de la ville,
Ouest qu'est nouot fort Régent,
Un temple druidick', le pus grand de nouotre Isle,
Gerry zen fist présent

Au Marshall Coneway - il est en Angliéterre,
J'voudrais l'faire ervenin -
Il érait pus d'valeu, dans nouot petit coin d'terre; -
Nos r'veindra-ti? - Nennin!

Sic transit gloria! les menhirs, les capelles,
Victimes des marquiaux,
Des mains des inouorans, des crowbars et des pelles,
Font crousler les chasquiaux.

Wace a dit: "tout fliaistrit, ne n'peut pour tréjoux vivre
Faut qui trouv' san déqulin"
"Si par Clier i n'est mins, sus papi, dans un livre,
Mesme oquor tout vait fin."

"Sic transit gloria Mundi!"