Here's today's text by our author of the month, Jean Sullivan:
Elégie: Anniversarium millesimum Sancti Helerii a Nativitate Christi
Mille ans, angniet mille ans! qu'eune bande estrangière,
Flioquet d'avanturoeux,
Dans nouot petit Gerry, sus san roc, sus sa terre
Commint un crime asfroeux.
Saint-Hélï, nouot Patron, ministre saint et sage,
Fut par ieux sacrifiai...
I' d'vint en un clin d'yi victime de lus rage
Et i fut descol'tai.
Saint-Hélï, les zéphyrs et l'onde la pus pure,
Ov l'azur le pus doux,
Sus tan gason en flieurs - ichin sus ta verdure,
M'ont donnai rendez-vous.
Ouais la clioche qui sonne! - ou convie ovec zesle
Le peuple en chu saint jour
A joindre à ten Eglize, ov la troupe fidèle,
Les chants du Guieu d'amour!
J'entre dans tan sanctuaire ovecque révérence,
Je t'y vait, Saint-Héros
J'y ressens tan pouvoier, ta subliesme influence,
Sus mes humbles travos.
Je veux pour nouot payis, l'histouaire de ta vie,
Di dan-la mé - descends,
Et escrivons ensemble eune simple Eslégie,
Pour pliaire à nouos esfans.
"Je fu nai z-en Gerry sus le bord du rivage,
"Man père était pesquoeux,
"I labouothait la terre autouo de l'Hermitage,
"Pis i dévint preschoeux.
"Un prestre, ya des chents ans, esfant de l'Armorique,
"Vint procliasmer Jessus!
"Vint descrier l'erreur d'la cast' Druidique
"Et d'lus guieux inconnus.
"Es jours de men esfanch' l'islot t'ait humble et pouore,
"Ché n'était qu'un désert,
"Ov quicq chents habitans, qui n'avaient pas oquore
"L'comprenouar' bain ouvert.
"Là bas dans la vallaie, ouè la ville est bastie,
"Là q'uest sis man Cliochir!
"I yiavait un moulin et eun' p'tite appentie
"Oué nou z-allait preschir.
"Exposzais sans défence à la fureur Normande,
"Es assaouts des brigands,
"Nouot troupé z-esfritai couothait devant la bande,
"D'ches cruels mescriyants.
"I vindrent un bouan matin pour assouvir lus rage,
"Et pour nouos terrasser,
"Mais le ciel bain marri, m'armit d'un saint couorage,
"Pour les accabasser....
"Mais, ô man Guieu, man père, i fallut eun' victime!
"Un sacrifice ardent.
"I lus fallut commettre un forfait, un grand crime,
"Et répandre du sang....
"Mé, je fu désigni, z-étant chef de l'E'glize
"Et menant le troupai,
"Qu'nou v'nait d'esparpillir..nou m'prend, nou m'martyrize.
"Et j'eus le co copai....
Oh! tu les fis frémir, ches asfroeux cope-teste....
Quand tu mins souos tan bras,
D'un air bégnadrai doux, ta bell', ta noble teste!
Sans le moindre embarras.
Ah! pour servir Jessus tu fis un grand miracle,
Car tu les fis fonder,
Eune abbaye, eun aszyle, un temple, un tabernacle,
Que tu fis féconder.
Ah nouot bain chier Patron, tu d'vins dans ten Empire,
Victime des forbans,
Dans ten antique austet tu souffris le martyre,
Angniet iyia mille ans!
Je vains ichin exprès faire un pélerinage,
Sus tan rocquir sacrai!
Nou z-y respire en paix dans chu doux Hermitage,
Que j't'avons consacrai!
Oh! man bouan Saint-Hélï, ta ville a tai prospère,
Vait com' oulle a flieuri!
Vait tan petit Islot, sa race noble et fière,
Et ten Esden chéri.
Ch'est un biau p'tit gardin que tout le monde admire,
Ch'est un p'tit Guieu-donnai,
Chest un roc Madérien, chest un mont de porphyre,
Que tuas bain patronnai!
J'tavons basti d'z-autets, j'racqmod'rons ten Eglize
J'allons l'a rajennir,
Surville à ses travos, ovec nous solemnize
Tan temple, tan souv'nir!
Bénis, ô Saint Martyr! nouot pays, nouot belle isle,
Protége ses esfans;
Instruis les de bouan'heure, oh! rends lus sol fertile,
Fais qui sçaient triomphans!
Souos tan modeste lief, tout est calme et silenche,
Chest un roc enchantoeux!
Ch'est un p'tit promontouoir' d'oué l'asme en paix s'eslanche
Et monte viers les Cioeux...
Agui petit Austet, - agui modeste asyle!
Je quitte tan saint sol,
Je rejoins le patron de ta joyeuse ville,
Ov li je prends le vol!....
No comments:
Post a Comment