Which was worse in 1913, the accident or the cure? Anyway, the doctor had a great car!
First Doctor Being an Ass - Another is Called in
Ou n'créthaites pon coumme les gens nos r'merquent dépis qu'la gazette - la sienne de Vendredi passé - dit du bin d'pépée. Ch'n'est pas qu'javaimes passé inapperchus jusqu'ichin Oh, nan! Dépis que j'soummes venus y d'meuthé, la ville n'en est pus la même. A qu'menchi par la gazette: la cirtchulation r'doublye toutes les semaines dépis qu'j'avons consenti à èscrithe dessus, et i's ont 'té oblyijis d'mettre eunne autre chainolle a la machine a imprimé pour poué allé pus vite. J'ai oui dithe par la servante d'un docteu qu'est d'la Classe de couotute a mémée - la servante, pas l'docteu - qu'sa maitre s'pleignait qu'ses malades liésaient l'Morning News a la pliéche de béthe ses boutelles, et se r'déthissaient ben trop vite. J'ai oui étout qu'y'avait un fermi qui faisait san monde cachi quédainne au travers en lus prouméttant d'lus liéthe le jerriais du M.N. a la fin d'la journée; et mé même, y's tchiq' temps, j'trouvi ti pon les filles de ma Girls' Friendly a s'ésgouffé d'rithe sus des lettres a pépée, a la plieche d'être a médité sus les lions qui rodent continuellement atoure les fille qui n'vont pon rédjuliéth'ment au tchulte.
Et d'pis ch't'articlye la, nou pasle des Pain oquo pus qu'jommais. Y nos vint un monde! Jusqu'a un grand jaune moto car a quat' roeus qui s'arrêti souos nos f'nêtres, l'aut' jour: dans l'moto car y'avait tchiq' chose enfliulé dans eunne pé d'ourse ov la tête dans eunne moniethe de lanterne. Tout cheunna ramonti amont nos d'grès. Chutte chose ôti sa lanterne, et y'avait eune tête de moussieu; il ôti s'n'ourse, et y'avait un corps d'houmme; il ôti ses mitaines; et y'avait des mains d'docteu. De belles blianches mains, ov des deigts longs et pointus et pas d'crache souôs l'songlyes. Des mains d'docteu - j'm'y r'counnais! J'en avais veu dèja d'vant.
Il avait oui pâslé du cas à mémée, qui dit; et d'la moniéthe que j'taimes a la doctrinné - pouôrait i' la vaie? J'l'emni par la main - eunne belle blianche main - ès pids du liét. Quand j'y'eut dit tchès qu'en 'tait, lé v'la qui s'mint a m'dithe: "Mais, vot' docteu, ch'est un bachouard! un fichu bûzard! un chérvé caillyi! I' n'se r'counnait pas pus a souognyi eunne femme qu'a té èsgliémmie par un bouais, qu'mé a féthé un ch'va! Voul'ous que je r'met' vot méthe sus pi dans très jours?" Ben seux, que j'veurt, qué j'dis; ou pouéz qu'menchi a tchérpenté d'sus des a ch't'heu!
La d'sus i' m'embréchi; il ôti sa casaque et m'r'embréchi; i' r'troussi ses manches et m'dit d'allé faithe eunne bachinnée d'grué. quand l'grué fut prèt, i' print eunne moniéthe de seringue dans san pagas, l'emplyi d'grué, ouvrit la bouoche a mémée avec un bouchon et lis serindji l'grué dans l'éstouma. Par siez fais i' fit cheunna. Et pis quand mémée fut bin ronde et qu'les couértuthes se souôs'l'vaient sus l'liét, et que n'y'eut pus d'grué, i' m'fit apporté toutes les blankettes d'la maison, touôs les couossins d'sofa, et les mat'nas du liet d'la bouonne-chambre. Tout cheunna fut mins sus mémée; et par dessus tout, en montant sus eunne tchaise, j'mînmes des plianches, des livres, et tchiq' vérges de tapis.
La! Miss Lonôre, qui m'dit en m'embréchant quand tout fut fini; n'faut pas qu'ou bouoge de la pour huit jours. Je r'vindrai lis pompé du grué d'main; en attendant, faites un feu d'forge jour et niet, freunméz portes et f'nêtres, et s'ou'l a sé dounnez li du bouollion d'poule bin pêvré.
La d'sus, i' se r'mint dans sa pé d'ource; j'y'aîdji a r'mettre sa tête dans sa moniéthe de lanterne, et i' s'en fut en m'faisant un 'sweet smile' et m'disant de n'pon oublié l'grué.
Miss Lonore Pain
Morning News 20/2/1913
No comments:
Post a Comment