L'Eglise dé St.-Brelade et Maistre Wace

Né v'chîn l'texte d'aniet d'not' auteu du mais, Jean Sullivan:

Here's today's text by our author of the month, Jean Sullivan:

L'Eglise dé St.-Brelade et Maistre Wace. - A.D. 1111.

Salut, bieau vièr Cliochir!
Salut, ô vieille Eglise!
Jé sis v'nu té cherchir,
Pour qu'un ségret tu m'dise:
As-tu veu z-un esfant
Sur les fonts du bastêsme,
A l'yi z esbliouissant,
Au r'gard noble et suprêsme?

L'as-tu veu v'nin pus tard,
S'ag'nouillir à la messe:
L'as-tu veu par hasard
A la main du vier Wace?
Sa prumieth' commugnion,
Chu pas béastifique,
Du Ciel le lumignon,
L'fist-ti souos tan portique?

Pus tard en r'venant d'Caen,
Quand ti v'nait vais sa mèthe,
V'nait-ti d'un coeur ardent
T'adrèchir sa prièthe?
V'nait-ti z-a tan austet,
Condit par iun des prestres,
Ov un chant solemnet,
Prier pour ses anchestres?

I r'chut le sait bastême
D'un vier prestre pesquoeur,
Sa commugnion du mêsme,
Mais z-il tait esfant d'choeur,
En r'touonant du colège,
I r'venait avec feu,
Ch'tait pour baillir un pliège
A m'n austel, à san Gieu.

I vint ov un' couronne
De louothi sus san front,
Ov l'air que Succès donne
Au fils stugioeux, profond,
De la fest' solemnelle
I r'vint, chergi de prix,
R'mercier Gui z-ovec zèle
Au pid du crucifix!

Quand-ti fut consacrai,
Quand-ti d'vint un bouan prêstre,
A tan temple sacrai
Vint-ti pour t'erconnaître?
Sa mèthe au coeu joyioeux,
Vint ovec san chier pèthe
Quand-ti chantait es Cioeux
Sa messe et sa prièthe.

Quand Henri le grand Roy
Le minst au pid d'san trosne,
Le fist chanter sa foy,
Son payïs, sa couronne,
Ah! Gerry tressailli:
Et dist que: "Gieu le garde!"
Et i s'esnorguillit
De san fils dév'nu Barde.

Quand-ti fut de Bayeux
Consacrai grand Canoine,
I vint dans tes saints lioeux
Donner la sainte scène,
I vint tout décothai
Dans ses habits de Prince,
Et i fut procliasmai
Le Roy de la Province.

La p'tite Isle en enquir
De s'nesfant orguilloeuse,
Vint-alle t'invoqui
D'unne ardeu génétheuse?
Oui! z-ou vint d'un bouan coeur,
Dans ses hardes de faste,
Mettre à san fils vainquoeur,
Un Louothi sus la teste.

Ché fut un jour glouothioeux,
Pour notre Isle, sa Mèthe,
Qui dans chu jour joyoeux
Le surnommit Homèthe.
V'là qui resjouït l'coeur
Quand un fils de noutre Ile,
Par talent, par laboeur,
Devaint un grand Virgile!

Pus tard i vint en Barde,
Ovec sa Lyre en main,
Invoquir Saint-Brolarde,
Li baillir z'un refrain.
I vint r'mercier san Gui,
Quand san âsme ravie
Vint chanter san agui
D'vant quitter chutte vie.

I laissit un grand r'nom
Bain merqui dans l'histouaithe,
Henry gravit san nom
Au temple de mémouaithe!
Le Rou, san grand roman,
Son Brut De l'Anglieterre,
Sont un ramémoithement
De nouotre grand Trouvère.

Esl'vons un monueusment
Et gravons, tant que j'sommes,
Sus un bel ornement
Les noms de nouos grands hommes.
WACE et FALLE et PIERSON,
LE GEYT, DUMARESQ, JEUNE,
CAP'LAIN, MILLAIS et DON,
F'ront l'honnoeu d'nouot quémeune.

Allons, Gerriais, m'sesfants,
Donnons à nouot jennesse
Des conseils incessants,
Instruisons-là sans cesse.
Chessa pour nouot payis
Un honnoeu, z-une glouaithe,
Pour parents et ammis
Une grande victouaithe.