L'Annais Bissextile

Né v'chîn l'texte d'aniet d'not' auteu du mais, Livonia:

Here's today's text by our author of the month, Livonia:

L'Annais Bissextile

La v'la ouocouo eune bouonne fais finie,
Mais yien a t'y yieu des Hardelles engagie.
Je m'en vais vos en dithe t'chicunne du canton,
Mais sus toutes choses je ne dithé pas lus nom.
Mais y sembient qui disent toutes: galants vérait d'yien,
Car les siens de prés j'en voulons absolument rein.

Yia la grande soeur de Lazare et Marie,
Tchest dans le mais d' Avri qu'ou fut engagie.
Mais le pouore triste, y prend bein d'la peine,
Car y veint la vais trais fais la s'maine,
Et donne tréjous au pepée doeux bouanne Cigares.
Le bouonne homme les fummes tandi qu'lest jeunes font la care.
Et quand y lus entre tchite et qui chaque de main,
Ou l'is dit a bétôt, je t'er verrait t'y d'main.
Y monte sus sa "Bike," et s'en va au grand trot,
Car il a à allé jusqu'au font du Mont Mado.

Yian a eune aoutre qui d'meuthe tout près d'yi,
Chette la a eun gas qu'est diversement actit.
Y veint tchique fais la vais, mais pas bein souvent,
Car y d'meuthe eun but, tout près du Couvent.
Mais quand y veint pas la vais, ches yi qui va,
Et d'même y lus entre arrange comme chonna.

Yia étout la p'tite Estelle du Vaiziné,
Qui va souvent en "Bike" sans mettre s'en chapé.
Chette la est engagie a eun biaoux p'tit fermi.
Qu'a l'air fort et robuste comme eun p'tit rotchi.
T'china demeuthe tout près d'la Ville.
Il a étout eun but a v'nin vais sa fille.
Il a étout eune "Bike," et d'même ch'nest rein
De v'nin bein souvent vais chaque n'ou zaime bein.

Yia étout eune raide belle grande Hardelle,
Qui va souvent toute seule a la Chapelle.
N'ou n'vèt pas souvent s'en gallant avec yi.
Ches s'en doute qui n'est pas fort hardi.
Mais ne v'la qui veindra avec le temps.
Car après tout, ches oucouo de touos jeunes gens.

Yia étout la sienne qui chante diversement bein,
Quand ou'l est à la Chapelle, cheque damne n'ou le sait bein.
Yia eun chier petit garçon qui va la vais souvent.
T'china d'meuthe tout près du Hot a Saint Cliément.
Il etha la pus hauote fille de tout l'Vaiziné,
Et eune "nice" fille, qui s'met bein a s'en d'vé.

Yia étout le pus p'tit couple du Vaiziné,
Qui vint ensemble au Dimanche, matin et l'sé,
Mais oul a tréjous s'en p'tit fréthe avec yi,
Ou n'aime pas a l'laissi tout seu, chu pouore petit.
Et pis pépée sait diversement marri,
Si ou'l allait s'promné s'en le p'tit Jonnie.

Ils allidre eun jour lus promné a la Corbiéthe,
Mais y fallait que ou'l enmnisse s'en p'ti fréthe.
Le gallant ne dis rein pour chute fais la,
Mais y n'voudra pas tréjous chonna.

A toutes, je lus souhaite bonheur et succès,
Sans toute fais oublié le poët Français.
Jeune fille, quand tu t'engage,
Tu ne sais ce que tu fais.
Tu te livre a eune esclavage,
Que tu n'en retireras jamais.