La "Bike" a Mary

Né v'chîn l'texte d'aniet d'not' auteu du mais, Livonia:

Here's today's text by our author of the month, Livonia:

La "Bike" a Mary

Notre Lou Lou vouli allé à la bataille de fieurs,
Et chest eunne fille qu'est d'eunne bein bouanne humeur;
Où dit, yietha du "skite" et je m'en vais yialé,
Et j'menvais emprunté la neuve "bike" a Mary.

La v'la arriveais, oh! mais comme où dis,
J'amais je n'avais veu ditet dans ma vie;
Envié des belles fieurs bas et pillé de sus,
Chest comme si n'ou enviet ses sous dans la rue.

Ou'l avait preins eunne pannelais de fieurs,
De toute espèce et de toutes les couleurs;
Car où tet "up" pour eun bouan "skite",
Pour eunne bataille "on Mary's Bike."

Ou q'manchi par en envié eunne poignie,
La arrive tchi piante, "la" "la" comme ou dis;
Où s'nallet justement se mettre en train de se rejouit,
Quand pouf ne v'la de yieaux qui l'is freumme eun yi.

Ou ser dêstoingni et long et large lus en conti,
Et ou lus dis taiesous ou j'vos fiche m'en pagni;
Criyious que je scai einsultées par ditêt,
Vraiment je criais que j'avais bein fait.

Quand doeux ou trais filles arrive sus l'champ,
Que la digotte avec des longues pieumme de pans;
Oul attrape les pieummes et les meins en miots,
"There" où lus dis "I fiche for you, now you can go."

Quand la pouore Lou Lou fut raseuthaie,
Tout étêt hors la "bike" et pagni et pannelais;
Ou mins tout de suite eune "blue man" sus pi,
Pour ertrouvé sa "bike," ses fieurs et s'en pagni.

Ou perdi l'homme de veue pour eune p'tit d'temps,
Et pis tout d'un coup tcheque n'ou zentend;
Chest tchiqueuns qui sont a avé du bri,
Au sujet de fieurs, d'un bieu et d'un pagni.

Ou vit que tchet eun mousieu qui tet dans l'embarras,
Le chantegni l'is pâslet et le t'net par le bras;
En rigolant il avait enviet s'en pagni,
Et avait ebranlet la tête et le chapé d'eun offici.

La pouore Louise resti comme eun tchian foietet,
Jamais de ma vie je n'riethai a ditet;
Mais tchesquest devenu de la "bike" a Mary,
Au jour d'agniet Lou Lou est ouquoi a l'savé.

Le l'endemain a jour ou filli par le prémiai baté,
Car oul avet eunne peueux de vais sa couozeine Mary;
Quand où fut eun but et comme ou dit "out of sight,"
Ou pensi "I wonder what has become of Mary's Bike."

Mais ou savet bein que chenetait pas san pagni,
Qui avait tet enviet au chapé de la tête de l'offici;
Mais si jamais eun pagni a fieurs est ertrouvet,
Si vos piez l'envié a Mary Jane, a Gouerret.