La Saison des Patates

Né v'chîn l'texte d'aniet d'not' auteu du mais, Livonia:

Here's today's text by our author of the month, Livonia:

La Saison des Patates

Quand la saison des patates tait bein passais,
La rumeur tait, que les fermiers taits tous ruinais;
Sans doute y fudrent longtemps a eun chelin six,
Et ches vraiment pas la eun bein bouan prix,
Pour de belles Patates.

Par le temps quil êthons péyi le dêsfouage et l'guano,
La bike a Missis, sa montre, et sen neu Piano,
Et les arriérages de rentes, y sont péyie!! mais quand!!
Car y faout étout acaté et péyi dans tchique temps,
De la smanche de Patate.

Et la smanche t'channais est a eun divert prix,
Y vos faout, pour eunne boïete, péyi eun chelin six,
Et p'tetre quand n'ou les désfouitha y sont a eun chelin l' cabot;
Eun homme qui f'tha ditait travas y faout qui sait fo.
Pour les Patates.

Car quand eun fermi a fait de sen mus et a travailyi,
Il y fait vraiment bein ma, de navé pas de profi;
Mais pourtchi qui n'garde pas doeux-trais bêtes a scais,
Le lard se vend chi, ches chonna qui vos paie.
Bein mus que des Patates.

Et pis, faithe du froment, v'la qui donne de l'êtrain,
Qui peut être meins souos les annimeaux au besoin,
Et nou nethait pon de gêne de compte de guano,
Nou zethait du fumi, y n'ian a jamais trop.
Et qui se vend mus que des Patates.

Nou dit que l'aoutre jour a eun grand Bâzar
(Et que la qui peyi eune raide bouanne carre)
Eune personne donni sies biaux p'tits annimeaux,
Et qui tes vraiment bein bons et, diversement biaux.
Y lus vendidre mus que des Patates.

Gardé étout tchique bouanne poules, car comme ou'l viyie,
Les bouan oeus lus garde tréjous a eun divert prix;
Faithe du sarrazin, de l'orge et pis du froment,
Et du Indian Corn en faithe ètout gentiment.
Chonna paitha mus que des Patates.

Y nia pon vraiment tant de gêne et dembarras;
Tout chonna est eun passe temps et du nice petit travas,
Et nou na pon de faithe de tant de tripot,
Et de tracachi sa pouore vie pour péyi le guano.
Si nou ne fait pas tant de Patates.

Oucouo doeux mots bouanne gens et pis je finie,
Ne tracachie pon tant votre pouore petite vie,
Travailyie, je veux bein, et fuite de votre mue,
Si ou faites votre devé ou ne pouvais pon faithe pus.
Mais ne faite pas tant de Patates.