Here's today's text by our author of the month, Livonia:
La Robe à la Mode
Notre petite Floe a yieu eunne robe cht'annais,
Et ou'l en avait dêjà pas mal de serrais;
Mais ou dis: Faout mus être horte du monde que de mode,
Mais ou ne la trouve pas du tout, du tout, kmode.
La premièthe fais qn'ou la mins ou fut bein surprinse,
Ou cru que la couoturièthe avait fait eunne mêprinse;
Car i' n'y-avait pas de difféthence du haout au bas,
Et de pouchettes ou n'en trouvait pas.
De vrai, ou n'savait pas de tchi but la mettre,
Et i' fallait hallé d'sus pour la mettre bein drette:
Et quand ou fut minse, pas moyien de marchi,
Pressie ou pas, nou n'pouvait pas avanchi.
Eun jour, ou tait prêssie pour prendre le k'min d'fé,
Et pour avanchi, ou pensi d'la r'troussé;
Et pis ou pensi qu'ou n'avait pas mins d'cotiyion,
Ou vint si mârrie qu'oul en dansi de mârisson.
A forche d'hallé d'sus ou vint à s'uzé,
Mais ou n'voulait pas pour chonna l'abandonné;
Eh bein, sça eun "X-rays skirt," comme ou dis,
Nou z'en vait dêjà ditais à Londres et à Paris.
Et quand vint le temps qui tonânni au fraid,
Ou la doubyi bein de bouan rouoge fiannet;
Et pis ou fis eunne "slit" des daeux côtais,
Ou tat quâsi faite comme eunne pathe de brais.
Si eun homme voulait eunne femme bouanne mênagièthe,
I' pouorait p't-être faithe mus, mais i' pouorait faithe pièthe;
Qui vainge pour notre Floe, ou'l est à mathié,
Et ou ne l'r'fusa pas s'il a des sous à l'y donné.
Enfin, si en aoutchun temps qu'on voulais la vais,
Prenais d's'informations du bord des Quennevais.
No comments:
Post a Comment