Un Bouan Noué - Aviers et Viers

"Un Bouan Noué" - eune poésie Jèrriaise liue duthant un bond d'né en Jèrri, l'1é d'Dézembre 2010.

"Un Bouan Noué", a Jèrriais poem about Christmas, read in the snow in Jersey, 1 December 2010

Un Bouan Noué
Aviers et Viers

Les p'tits aviers s'en vont annièt
Dès qu'i saut'tont hors de lus lièt
Sans doute s'entr'dithe lus p'tit souhait:
"Un Bouan Noué."

Quand, hors d'lus cauches, ils éthont prins
Chein qu'lé vièr Noé lus étha mins,
I sé r'dithont, garces et gamins:
"Un Bouan Noué."

Quand j'étions mousses, dès l'sign' dé jeu
J'nos rêvillions - ch'est d'même achteu -
Pour nos entr'souètter dé bouan tcheu:
"Un Heutheux Noué."

En qu'minzolles blianches, viyous l'troupé,
Ov lus pids nus, malgré la fré,
Les entendous s'entr'chuchotté?
"Un Bouan Noué."

"Nè f'chin la chambre à p'pée et m'mée
"Ne faites pas d'brit - s'sont i trompés
"Quand j'lus criethons dès notre entré?
"Un Bouan Noué."

"Ouvres la porte, achteu, douochement,
"Pas une pathole, pas un mouvement,
"Dévant qu'aver l'mot dé qu'mandemant:
"Un Bouan Noué."

"A un ôrage, i faut qu'ch'la r'sembl'ye
"Allons: y'êt'ous, criyons ensembl'ye,
"Jusqu'à ch'qué la maison en trembl'ye:
"Un Bouan Noué."

......................

Et pèthe et mèthe, tchi n'dorment pas,
S'rêvillent quand même, à chu frédas,
Et rêponnent en riant à ha has:
"Un Bouan Noué."

Si ch'la fait rithe la d'jaingue d'aviers
Y'a l'même pliaisi pour les pus viers
I s'entre disent (qu'ils en sont fiers):
"Un Bouan Noué."

Ch'là fait du bein même ès vieilles gens
D'ervénin mousses dé temps en temps;
Ch'est pourtchi j'tchitte en vos souêttant:
"Un Bouan Noué."

Thomas Laiduze
Écri pour le jour dé Noué, 1905