1912: Pour Noué

La Chronique de Jersey 25/12/1912:

Bonjour tout l'monde! J'vos souhait' un raide Bouan Noué! et pas de r'frédeuse ès ouies - j'en sis venji: ch'est pour cheunna que j'cliopinne un mio. Et si tchiq'fais y s'adounne que j'sembye craulé en sortant d'faithe eunne coummission siez Mess Ordinaire, n'allez pas créthe, au mains, que ch'est ch'qu'ou criyis. Ch'est des r'frédeuses!

Ch'est mé qu'ai la djob, ch't'année, d'vos souhaité un Bouan Noué. Tout ést chen-d'sus-d'sous a l'office. L'Editeu a yeu du bri ov sa belle-méthe viyant qu'ou r'fûse de payi un pico pour lus dîné d'Noué: y'eut eunne bastaude, et d'la pién'nie de g'veux, et d'pis y n'ôse pon s'montré en pubyi. Mess Huelin est trop embarassé a allé et v'nin d'l'office à la Banque, porté des poutchies d'cappeurs et rapporté des satchies d'louis pour payi nos gages - and a Christmas Box. L'Caouain a mangi l'stoffinne qu'sa femme avait prépathé pour l'ouèsé qu'les Grouvillais y'ont mins dans sa cauche - et nou' r'garde la fin sus l'pouôre médjan; et Trouve-à-r'dire a l'chérvé déslotchi a forche d'èsprouvé a dèsmêlé l'histouéthe de chutte vaque qui r'nouvelle touos l's'ans en Jerri et avorte en même temps en Améthique.

Ch'est-tan-tchi, y n'y'a pour bin en dithe qué mé qui reste en tnanche!

Quand l'editeu m'fit ramonté dans sa chambre. - Y garde le liét: il a l's'ieux couerts de gris papi, l'nez bouchi d'mie-d'pain trempé d'tathe, les lévres ércouôsues ov du fi-d'laiton, et nou n'a jommais peu r'trouvé l'bu de s'n'ouothelle - quand y m'dit - sa vouée n'tait qu'un soufflye - d'avé a souhaité un Bouon Noué a touôs nos lecteurs; j'nos èsgouffîmes a plieuthé touos les deux, et j'éthais tchée èsvonni de m'zéspé d'vaie man pouôre maître avrôné d'la sorte sinon pour eunne boutelle de... médcine qui s'mint l'goulot dans ma bouche.

J'vos souhaite un raide Bouon Noué.

Pour dé mé, jé n'm'attends pon à grand frico. J'sis pour dîné siez les Pain, Piteur Pain du Morning News; et l'dîné s'a maigre s'lon l'humeu qu'Missis Pain s'ra. Et pis, l'bouonhoumme est un mio ennyant quand y s'met a pâslé du temps qu'il tait forgeux à la Côte: et lus fille, Miss Lonôre, - Leeonorà, coumme y voudraient qu'n'ou dîse - ch'est la pus drôle de persounne! Et un mio lunatique suivant les saisons, a ch'qui pathait.

Mais tout cheun'chin vos embète, j'cré bin! Extchusez mé si j'vos pâsle de mé quand ch'est d'vous, les lecteurs de la Chronîque, qu' s'agit. Ch'est, coumme j'vos l'dit, mé qu'à la djob de vos souhaité un raide Bouon Noué Numétho Yun. J'vos l'souhaite de toute ma forche! J'éspethe qu'ous éthez tous des presents qu'éthont couôté chi, et qu'les siens qu ous éthez yeu a envié éthont 'té accatés un bardjin. Et nou vos r'verra tous en ville Sam'di: les filles ove de neuves broches, les garçons ov de belles gélésses, et les péthes de famille a couôre de boutique en boutique payi les comptes de lus femmes ov les sous qu'is ont gagnyi sus lus tomattes.

Samuel.

Tchi rîzibye histouethe dans l'Alménas. J'la lu l'aute' sé à ma tante. J'fut oblyigi d'arrêté a mié qu'min: ou s'n'allait bosté.