Friday 5 August 2016

Un sonnet au gardîn

Un sonnet au gardîn
La lavande bourdonne aupi du louothi
et l'roumathîn dgêpe à l'entou d'la m'thoûque;
un touffet d'bourdons êssèment à flieuthi;
un solé d'myi mithe à faithe lithe les moûques.
Lé thŷmbre attînfé d'însectes sé dêhale
souos l'olivyi tch'alloue un brîn d'abri
au brit heuné des bordeûthes tchi brîmbalent
en feuntchant les fieillets des moûques à myi -
et tout l'gardîn tressonne en harmonnie:
les flieurs tch'y fliottent d'auve les bêtes tch'y hèrmonnent;
lé chuchet chuche l'ambron d'la bourdonn'nie;
la menthe môle et la marjolaine entonne...
Les ailes à la lavande sont baîsies d'brîns:
ches m'sagièrs meûthis tch'êmoûquent lé gardîn.

No comments: