L'Examen

Eune poésie d'Livonia d'1901:

A poem by Livonia from 1901 (yes, the spelling is a bit eccentric!):

L'Examen

Avous jamais tet sus un "stage,"
J'entends a eun examen,
Chonchein vos eintérraissat p'têtre
Quand j'vos contait pour le sien.

Sus tchiq' jalli eunne fais chanté
Tchet reinque l'année pâsée,
Mai j'amais j'en peux l'oublièr
Quand j'vivrais pour des années.

J'allimes eunne fais à la pratique,
Eun sé devant l'examen,
Mais vraiment tchet magnifique
Comme les parties accordaient bein.

Yiavet deuex des Miss Renot
Et deuex des Miss Le Grand,
Et pis Missis qui chante l'alto,
Qui sont toutes pour le chant.

Yiavait étout Mess le Souffrant
Avec tout sa famille,
Chest la des gens qui sont charmants
Et des gens qui sont bein abiles.

J'entrîmes par les apartements
Et toute suite n'ou nos dîts
Entrées, Entrées, il est grand temps
Qu'ou seyiz tous bein assis.

Enfin j'montimes ieun à la fais,
V'la qui nos preins du temps,
Car helas! n'ou n'avet que d'tchiees
Sus les p'tits êtrais bancs.

Et pis n'ou marchet su's eunne pianche
Assez pour se rompre le ko,
Nou yen attrapet ieun par la manche
Pour vos aijdyi eun mio.

A la fin je fûmes tous assis
Près a faithe notre devai,
Toute suite la Chapelle fut rempyie
Pour nos entendre chanté.

Les chants furent bien admithées,
Et pis le sermon etet bon.
Nou n'est jamais enniez ni lasseez
D'ecouter la voie de Mons. Esnon.

Quand j'fûmes finis, j'taime en miots scais
Et nou nos enmni sans l'savei
A baithe eunne bouanne tasse de thais
A une maison tout près de la mé.

Yiavet eunne tabyie bein draichie
Et tout yietait si bé et si bon
Comme le temps passait est partie,
Ou a Mariage ou Election.

J'y rallimes eun scé dans la s'maine
Les prix y étaient distribuées.
Vraiment v'la qui valait la peine
T'chet la eunne belle sethaie!!!

Yiavet des belles recitation
Par presque tuous l'êfants,
Et des dialogues par les garçons,
Et pis! Le Chant!! Le Chant!!!

Et comme a tout qu'menchement yia fin,
Et quand la séthaie fut finie,
Y falleit pensai a s'en r'venai
Et cherchi de la compagnie.

Les euns avais preins lus tcheethrio,
Car yiavet yien à marchi.
Les aoutres ne lus prêsidrent pas trop.
Et lus vaizains vint les cherchi.

La vetuthe etait si pienne
Qui n'iavet pas d'reun pour me,
Je cuothi a en perdre haleine
Presque tout le long du qu'mein.

"Le pauvre quoi qu'il soit honnête
De le mepriser l'on fait toujours fête."
J'tet la man cas chute sethaie la,
Mais heutheusement j'en ai pas ieu d'ma.

Livonia
1901