A poem for European Day of Languages:
La Journée Ûropéenne des Langues 2014
Lé tou du trou du bouais d'fendu,
la langue s'y sîl'ye à sèrpenter;
chutte langue laminne à touos les buts;
ou s'dêhale, froutchie et fritée;
ou sûffl'ye freûleusement et suggéthe
la prêch'chie d'poummes, la mang'gie d'mots,
la d'vouoth'thie dé san divuldgéthe,
des murmuthes d'mangues en margalot:
eune tentâtion dé d'vis et d'frits
litchis par la langue dans l'gardîn,
sîlyie par l'ouï-tchi d'un poummyi
tchi juse d'l'amour et du lamîn.
V'là la langue nouée lé tou du bouais,
touônnée du bord bliat d'eune bouochie;
not' dgèrgon dgéthote dans sa vouaix -
ch'est-i' un péché dé l'prêchi?
Geraint Jennings
Septembre 2014
No comments:
Post a Comment