Wednesday 22 January 2014

1916: A Forecast as to the future

Jîngouais joffé ou sornette satirique? Ch'est d'chouaîsi pouor ch't' histouaithe d'la Preunmié Dgèrre Mondiale!
Out-and-out First World War jingoism or a sly send-up? You decide!

A Forecast as to the future
En atendant que l'Contingent sét formé pour allé au Front, y'a bri qu'les hautes-paraisses sont en èsmeution. J'ai oui dithe que les fils d'fermi des paraisses d'amont ont l'chérvé touôné d'jouée au prospé d'allé ov mé fini d'èsmaglyi touos chès boustres de Prussiens qu'ont la prétention d'voulé gâgnyi la djèrre.

Chèst conv'nu, garçons; j'nos n'allons lus montré "wots-wot" à chès tas d'pend'loques. Mais, pas tout à fait ocquo si vite. Faut dabord fini le Saison, rensmenchi la terre, rentré l'avout. Eunne fais tout en r'pathe, les comptes payis, et tchiq' soummes de rente remboursée - j'vos enviêthai mendaton.

Ché s'a pour che S'tembre, a ch'que j'ai oui. D'ichin là, les Russes s'en vont continué a l's èsmaglyi a l'Est, l's Angliais et les Français les pourchas'sont a l'Ouest, les Italiens l's èsgliémithont au Sud, et la fliotte Angliaiche bouch'cha touos l's issus tout à l'entou. J'les t'nons! dites que j'vos l'dit. Et quand not' Contingent dèsbérquétha au Front, not' djob s'a d'les pourchassé dans l'dos. Ch'est là qu'i' f'tha bon les vaie tcheurre! J'nos y vé dêja! Mé et l'General (i' m'est d'fendu d'dithe san nom pour a ch't'heu) l'avant, a la tête, au sien qui courra l'pus vite. Vous, touos les braves de St. Ou, de St. Mathie, du Vaux-d'la-Mathe, des Coniéthes, du Dou-du-Canard, et la djingue de l'Est, sans pâslé des villais, tous a gallopé souontre mé et l'General pour tâchi d'arrivé les prumiers! Et vos baionettes qui s'enchîtréthont dans les pend'loques! et vos tallons d'botte sus les salles faches! N'y'en réstétha pas, sinon deus-très que j'èspein'non pour les ram'né en Jerri et les proum'né dans l'square pour que les femmes pièsse lus èscoppi sus l'muzé. Car, n'y'a pas a s'y trompé, che s'a l'aquev'ment d'tout quand les Jerriais s'en d'ment'tont! Avous r'mértchi qu'les dérnié victouthes ont c'menchi justément après la Seance des Etats? Ch'est pourtant d'même! Quand les Prussiens ont yeu vent de ch'que s'passait ichin, ch'a té l'acquev'ment.

"Gott in Himmel!" a dit l'Kaiser - j'tchins cheunna d'bouonne source - "les Jerriais s'en vennent! J'soummes tchuits!"

Et tchuits i' sont, n'y'a pas l'ombre d'un doute. J'arriv'thons au bouan moment pour fini d'les achouêmi, et - j'vos l'dit en grand sécrét - si j'nos battons bin, et pourvu que j'piêsse dithe au General que j'sis content d'vous, et qu'persounne n'a hallé a r'tchullons: J'îthons à Berlin!!

Malheutheûsement, je n'peux pon proumettre d'em'né au Front touôs les siens qui pépient pour y'allé. Y'en a d'vous qu'êtes tous-seurs sus vos fermes et dans vos boutiques; j'ai grand r'gret pour vous mais j'pense qu'ou s'ais r'fuzés. Touos les siens qu'ont l'nez teurt, qui cliopinnent, qu'ont des véthues; et les siens coumme Amice Machon, qu'ont pas payi lus rât, séthont renviez siez yeux coumme des tchans fouôttés. Après cheunna, j'criethai: "Squad, 'Tention!" et l'General pas'la tchiq' bouonnes patholles, et finitha par dithe: "Now, lads. All cowards fall out!"

J'n'en counnais qu'très - de tchi qu'Sam Lenfesté en est yun - qu'éthont l'couothage de faithe rouogi lus méthe de honte. Et pis, après, l'General crietha: "Oos for England, 'ome and Glory?" et j'criethons tous "Hourras!" et j'enviéthons nos chapiaux en haut. Tout l'monde chaqtha d'main avec tout l'monde: filles et femmes vindront met' lus bras atouôre de not' co, nou ritha et nou plieuth'tha sans savé pourtchi, et tchiq'un dèshal'la eunne "flag," et je fthons l'tou d'la ville en chantant "Malbro s'en va t'en djerre," et tout l'monde d'èshal'la a lus portes pour nos blowé des kiss; les filles nos couvrithont d'flieurs, et l'Counèstablye d'la ville f'tha empouognyi Sam Lenfesté et sa triste djingue, et les met'ta a sérchyi l'herbe a l'entou d'l'Eglyise de la ville!

Piteur Pain
Evening Post 20/6/1916

No comments: