George d'La Forge: Lé jour d'èrpos

Lé jour d'èrpos

Fort Lauderdale,
Florida, USA
Lé 31 dé janvyi, 1981

Moussieu l'Rédacteu,

"En apprannant les Dgiex C'mandements à l'Êcole du Dînmanche à St. Georges Dînmanche pâssé, Moussieu Pépîn nouos dit tch'i' n'faut pon travailli lé septième jour dé la s'maine. Est-ch' pour chenn'na qu'tu freunme la forge au dînmanche?," jé d'mandis à Papa eune séthée quand j'tions au pid du feu auprès l'thée.

"Oui dgia!", i' m'dît.

"Mais," j'lî dis, "si lé j'va à Moussieu Hâcou pèrdait iun d'ses fièrs en portant san maître et Madanme et les D'mouaîselles Hâcou à St. Georges un Dînmanche, pouôrrais-tu lî'en r'mett' iun?"

"Eh bein," Papa m'dît, "y'a raîson dans toutes choses. J'ai confianche qué, dans un cas d'même, lé Bouan Dgieu m'pardonn'nait si jé v'nais en aîgue à Moussieu Hâcou, prîncipalement comme lé chabot du pouôrre chéva pouôrrait êt' endonmagi par la pèrte d'san fé. Et i' y'a un pâssage dans la Bibl'ye où'est qué Notre Seigneu fut d'mandé eune tchestion sembliabl'ye et tch'I' rêponnit qué si eune brébis tchiyait dans un pits ch'né s'sait pon un péché d'travailli à la r'haler. Sans doute, Moussieu Hâcou et sa fanmil'ye pouôrraient laîssi la ouaguinette et lé j'va ichîn et continnuer à pid à St. Georges, eune affaithe dé dgiex minnutes, quandi qué jé s'sais à féther lé pid du j'va, et lus cocher îthait les r'trouver à la sortie. Dans un cas d'même jé n'lî chèrgéthais pon rein - ch'est en tchi jé né s'sais pon à profit par aver travailli au Dînmanche."

"Tch'est tch'i' font dans les navithes lé jour d'èrpos?", jé d'mandis à Papa, tch'avait 'té naviguant. "Lus Cap'taines les mettent-t-i' à l'ancre pour lé jour?"

"Oh mais nannîn!", i' m'dît. "Dans les navithes nou-s-est absolûment sujet à la volonté du Bouan Dgieu, êgard à l'Injuthe du temps, et i' faut navidgi l'Dînmanche comme sus s'maine, et mett' les vailes à haut ou les d'valer comme les vents changent."

"V'là tchi m'ramémouaithe qu'eune fais, en viage dé Wêmue à Buenos Aires dans un navithe Angliais, j'avions un autre Jèrriais à bord. San nom 'tait Âmice Lé Veslet. Ch'tait san preunmié viage au long cours. Il avait c'menchi comme couque dans les p'tits navithes dé cabotage. Un bouân garçon. Il avait 'té convèrti à la Chapelle et i' liêsait sa Bibl'ye et dîsait ses priéthes dans l'châté touos les jours. Nou peut dithe tch'il 'tait un vrai exembl'ye pour touos nous.

"Malheutheusement, les mat'lots n'sont pon généralement fort réligieux. I' savent mus juther qué d'prier et i' sont pus au fait à jouer ès cartes qu'à liéthe les Saintes Êcrituthes. Mais i' laîssaient Âmice trantchil'ye et n'lî dîsaient rein sénon quand vînt l'preunmié Dînmanche en mé. Chu jour-là, Âmice èrfûsit d'prendre san quart, dîsant qu'sa réligion n'lî pèrmettait pon d'travailli au Dînmanche car ch'tait contre les Dgiex Commandements, et i' nouos montrit des pâssages dans eune Litourgie qu'un homme d'Églyise y'avait donné comme preuve.

"Lé Contrémaître vînt êprouver à l'faithe changi d'idée, mais pon mouoyen. Quand un Jèrriais a d'tchi dans l'idée, i' n'l'a pon ailleurs! Finnalement, i' fallut rapporter l'affaithe au Cap'taine. À nouot' grand' surprînse, il eut eune pachience èrmèrquabl'ye pour un Cap'taine. Il êprouvit à lî montrer tch'i' fallait bein que l'navithe continnuîsse san viage au Dînmanche comme sus s'maine, car nou n'pouvait pon l'amather à eune cauchie en plieine mé pour lé jour, et qué ch'tait lé d'vé à touos les mat'lots dé faithe lus quart pour lé garder en allant. Et qu'eune fais arrivés à Buenos Aires i' pouôrrait aller à l'églyise touos les Dînmanches.

"'J'vouos r'mèrcie,' Âmice dît au Cap'taine, 'mais j'ai ouï tch'i' sont touos Catholiques Romains dans chutte ville-là, et jé n'voudrais pon aller à l'églyise là, car Mess Bisson, Ouoyamme dé La Chronique, tchi m'a convèrti dans La Chapelle Îndépendente en ville, m'a dit qué les Catholiques brûlent dé l'enchens et font un tas d'chînmagrues et qu'ch'est eune abominnâtion dévant lé Seigneu'.

"'Eh bein', l'Cap'taine lî dît, 'ch'est seux qu'chu Moussieu Bisson connaît sa Bibl'ye mus qu'mé, mais i' m'sembl'ye tch'i' n'y'a qu'deux odeurs mentionnées d'dans - d'l'enchens et du souffre - et i' faut s'accouôteunmer à iun ou à l'autre sus tèrre'.

"Lé Cap'taine finnit par pèrdre pâchience et dît à Âmice qué s'i' n'travaillait pon i' n'éthait rein à baithe ni à mangi, car i' n'voulait pon faithe lé couque travailli à lî graie des r'pas au Dînmanche à mains tch'i' travaillîsse comme touos l's autres, et Âmice finnit par prendre san quart. Il avait eune fanmeuse appétit, et v'là tch'en gângnit sus les Dgiex Commandements. Mais i' né r'allit pon en mé auprès chu viage-là."

George d'La Forge