Wednesday 1 January 2014

1911: Prédictions pour dziexs-neu' chents onze

Bouonne Année 2014! Né v'chîn du niolîn d'1911:
Happy New Year 2014! Here's some nonsense from 1911:

Prédictions pour dziexs-neu' chents onze

Ch'est bel et bin d'souhaité vie et prospéthité ès gens: v'la tchi n'couôte rin et nou happe des faies eunne litcheu a bouan marchi. Mais, m'est avis qu'nos clients sétont contents d'ouïr des nouvelles seuthes sus l'av'né.

Pour liethe l'av'né (a ch'qué m'dit pour très schlings eunne dîseuse dé chance dé la Roque), nou s'en va, a mînniet dans un chumtiethe d'Eglyise dé tchiq' lé Récteu est veuvi en deuxième neuche; nou s'met sus l'dos, la tète sus eunne plieumme dé caouan, au Nord du chumtiethe, pids et gambes en crouée. Nou s'met un gallot d'granit sus l'estouma, et nou reste d'mème eunne heuthe en disant a mié-vouée:

Ka-ra ki-ri,
Dis mé tchi ri, etc., etc.

Y'en a douze linnes, qué j'e'n vos dithait pon: ou's en séthaites trop long. Si tout c'est passé coumme-y-faut, ch'qué nou's èscrit l'lend'main est puthe véthité.

Né v'chin des choses qui s'arriv'thont fiabliément ch't'année si j'sis chorchi:

Y'étha un fermi français qui dèscamp'tha sans payi sa terre... San propriétaithe r'non'cha, et s'n'itha travaillyi a san jour sus la ferme téchnique.

Y'étha un tas d'sous dèspensée pour des bûsoqu'thies a l'Hopita.

Mess Bisson d'la "Nouvelle" louetha sa boutique au pit d'Pier road, au Coumiti d's'Estats pour y vendre les lédjumes d'la ferme esperimentale.

L'Counèstablye dé Saint Sauveux continuetha a voté tréjous et sans cesse du bouan bord... lé bouan bord, ch'est souontre s'en récteu.

Moussieu l'Bailli itha a la pèque ès Mintchès, et r'vindra tard pour ouvri la Cour... n'y'a pas d'amende.

Un offici d'police s'sa chinq minutes tard lé jour dé s'n'assermentation... chinq louis d'amende et frais.

Les poummes-dé-terre s'ont bouan prix a la fin d'Mai, mais y'étha un haînu sus les néthes gradilles.

Daniel lu bâsdra du fi a r'teurtre dans l's'Estats.

La vaque a Piteur Pavoux avortetha... sa g'niche morte remportétha pus tard un preumi prix dans les g'niches-mères.

L'Député dé Saint Groutin présent'a un Projét pour qu'un membres des Estats né piesse pas vendre ni loué rin a l'Administration... touôs les 'inamovibles' pouffthont d'rithe.

Y'étha eune èspici condâmné a l'amende pour avé vendu du sablion dans tchi y'avé du pèvre.

L'Député Crill f'tha eunne loué sus l's'hîtres: ov deux chents louis, li et Moussieu Sinné sémthont d'la grenne d'hître autou d'l'Ile.

Y'étha des neuches en Septembre. Y'a eunne forte surprînse qu'attend l'nouvieau mathié. Console té, mon vi: ch'la n'sé vé pon d'jour, et a bon d'gens n'en savent rin.

Y'étha d's'avocats tchi pérdront lus cause... Y dithont a lus clients qu'les Juges sont d's'achocres.

Si y'a djèrre entre deux pays protestants, touôs les deux prîthont l'Bouan Djeu pour gâgni... l'Bouan Djeu n'sétha pon a tchi piethe.

Les très mille ching chents chinq almanas qui nos restent s'sont touôs vendus pour la fin du mais... y'étha pieurs et grin'chie d'dents pour les siens qui n'vennent pon en q's'si en temps.

L'caouan étha un accident... il en cliopinn'na pour longtemps.

Samuel
La Chronique de Jersey 4/1/1911

No comments: