Lé chent'naithe dé la Batâle - The centenary of the Battle

La Pâraisse dé Saint Hélyi tcheûte des sou pouor un monument à la Batâle dé Jèrri/eune statue du Mâjeur Peirson: La Tcheût'tie pouor eune statue. La tchestchion a 'té distchutée bein des fais d'pis l'mitan du dgiêx-neuvième siècl'ye. En 1980 George d'La Forge s'en d'mentait, un an d'vant lBichent'naithe:

The Parish of Saint Helier is fundraising for a monument to the Battle of Jersey/a Peirson statue: Peirson Sculpture Appeal. For a century and a half attempts have been made to get a statue erected. In 1980, the year before the bicentenary of the Battle of Jersey, George d'La Forge had proposals of his own:

Lé chent'naithe dé la Batâle

...V'là tchi nouos ramémouaithe qué l'six d'janvyi d'l'année tchi veint es'sa san deuxième chent'naithe. Y'a-t-i' pèrsonne en Jèrri tchi s'en va s'en d'menter et mett' l'affaithe en allant pour eune célébrâtion dîngne dé l'occâsion?

L'articl'ye dé "Meridian" nouos dit qué l'Sieur Edward Le Feuvre est d'avis qué l'monument pliaichi dans l'églyise dé St. Hélyi en l'honneu du Mâjeur Peirson n'est pon suffisant comme objet d'èrconnaîssance à la mémouaithe du Mâjeur tchi fît l'sacrifice dé sa vie pour empêchi l'Ile d'êt' prînse par les Francais. Eh bein, nou peut dithe qué l'Sieur Edward a p't-êt' raîson. Ouaithe qué ch'est un bieau monument, i' n'est pon situé dans eune partie d'l'églyise tch'est veue par lé grand nombre dé vîsiteurs tch'entrent d'dans touos l's êtés, et j'mé d'mande même s'i' n'y'a pon un tas d'Jèrriais, prîncipalement les jannes d'aniet, tchi savent exactément où'est tch'il est.

(...)

Si l's autorités d'l'Ile ont l'întention d'célébrer l'deuxième chent'naithe dé la fanmeuse Batâle dé Jèrri l'année tchi veint, i' s'en va êt' temps d'mett' l'affaithe en allant. Est-i' possibl'ye dé trouver eune pliaiche assez conv'nabl'ye et dîngne dé l'empliaichement d'eune estatue du Mâjeur Peirson tchi donnit sa vie pour empêchi Jèrri d'êt' engaûmé par la France comme lé reste dé la Nouormandie? Et est-i' possibl'ye d'en produithe ieune, eune estatue du Mâjeur, en temps?

S'i' fallait suggéther un empliaichement, jé s'sais d'avis qué l'Vièr Marchi est la miyeu pliaiche - du côté d'l'églyise et en fache dé l'estatue du Rouai George. Sans doute, ch'est où'est tch'est lé Rouai qu'eune estatue du Mâjeur Peirson dév'thait être, viyant qu'ch'est tout près d'la tch'i' fut tué l'jour dé la batâle, mais oulle a 'té là si longtemps qué ch'n'est probabliément pon la chose dé l'êchangi. Eune aut' mangnifique pliaiche éthait 'té La Parade, domaine du Général Don. J'mé d'mande si i' s'en va êt' nécessaithe dé bouogi l'Général à cause des neuves offices tchi s'en vont êt' bâties là.

Enfîn, ch'n'est pon à mé d'êprouver à donner d's avis ès autorités d'Jèrri. I' sont bein capabl'yes dé lus en d'menter ieux mêmes, d'un empliaichement pour tchique sorte dé monument. Mais ch'est honteux qué la seule chose tchi montre la pliaiche où'est tch'i' fut abattu par eune balle dé l'ennemîn est deux-s'trais mots sus l'pîngnon d'eune aubèrge!...