Et acouo du George d'La Forge entouor la Batâle dé Jèrri. Chutte fais, il êcrivit au mais d'Janvyi 1969:More from George d'la Forge writing about the Battle of Jersey. This time, the letter was composed and published in January 1969:
Lundi passé - l'six d'janvyi et l'chent huiptante-huitième annivèrsaithe dé la Batâle dé Jèrri - m'faîthait penser à ch't' êpoque-là dans nouot' pétite île, et j'êprouvais à vaie, dans m'n idée, L'Vièr Marchi d'chu temps-là atout sa vielle cohue et sa crouaix en pièrre ou-est qu'la statue est à ch't heu. Tchi jour tragique pour les Jèrriais d'mil sept chent huitante-ieune! Ouaithe qué l'nombre d'tués dans chutte pétite dgèrre-là n'est rein à compather ès nombres d'Jèrriais abattus dans les grand' dgèrres dépis, y'avait quand-même du deu tchiques maiethons, et ch'est seux qu'les ridgieaux 'taient bas et qué l'crêpe fut porté pour tchiques années par les femmes. Et j'pensais au p'tit nombre d'rues dans la ville dé St. Hélyi à ch't êpoque-là, et j'mé d'mandais si les soudards dé la Milice ou les rédgulièrs Angliais assembliés sus L'Mont d'La Ville pouvaient vaie tch'est tch'i' s'pâssait dans l'Marchi d'vant d'scendre pour sé mêler dans la batâle. tch'est qu'jé n'don'nais pon pour pouver vaie l'vièr Jèrri d'chu temps-là atout ses maiethons couvèrtes en glyi et la feunmée monter trantchilement par ses cheunm'nées comme dé l'enchens vers les cieux, et ses p'tites rues encombrées pûtôt par du ponsi (et p't êt' malheutheusement par du pité dans l'hiver!) qué par des motos!
Et j'mé d'mandais combein tch'i' y'avait d'gens dans chu pays-chîn d'deux chents millions d'habitants tch'avaient autcheune idée qu'La Batâle dé Jèrri avait ieu lieu, et combein tch'i' y'en avait parmi les Jèrriais tch'y d'meuthent tch'avaient pensé à s'n annivèrsaithe!
No comments:
Post a Comment