Ramémouaith'thie ès Maîtres et Maitresse du Jèrriais

N'oubliez pon l'INSET jeudi 28 d'avri à 10.30 au Départément pouôr l'Êducâtion, l'Sport et la Tchultuthe

Reminder for Jèrriais teachers - Don't forget the INSET on Thursday 28th April at 10.30 at ESC

Chansons et musiques du Mortainais

La Loure rapporte:

Voici le nouveau disque de La Loure disponible !

Volume 3 de la collection Sources, dédiée aux répertoires traditionnels des Pays de Normandie, ce disque porte sur les chansons et musiques traditionnelles du Mortainais, territoire situé au sud du département de la Manche, aux confins des régions Bretagne et Pays de La Loire.

Une nouvelle parcelle du patrimoine oral de Normandie à découvrir !

La Saint George - Saint George's Day

Lé 23 d'Avri, ch'est la Saint George.
23 April is Saint George's Day.

La Saint George

“À la Saint George, bouonhoumme sème tes orges, car à la Saint Mar il est trop tard” - né v'là un vièr diton Jèrriais. Et av'-ous s'mé vos orges, bouonnes gens? Sénon, i' vaudrait adréchi eune priéthe à St. George tchi 'tait, li, fèrmyi avant d'êt' soudard et pis tortuthé et exétchuté souos l'Empéreur Romain Dioclétien au c'menchement du quatrième siècl'ye.

Et, bouonnes gens, s'ous avez des dragons siez vous à vos vengi, à roussi lé lînge à la lîngne auve lé feu d'lus nâsil'yes dans l'gardîn ou dans l'bel, ou à enfuntchi l's appartéments, i' faut vos adréchi à Saint George étout, car il est eune manniéthe dé Rentokil parmi les saints quand nou-s'est disteurbé par des fichus dragons.

Un but d'la Bibl'ye - Scripture snippet

Des buts en Jèrriais d'la Bibl'ye pouor l'annivèrsaithe d'la vèrsion Angliaîche d'la Bibl'ye dite du Rouai Jacques, ou Autorisée:
Jèrriais Scripture snippets to mark the anniversary of the English translation of the Bible known as the King James or Authorised Version:

Épis Pilate prînt Jésû et l'fît vrédîndgi. Et les soudards teurtchîdrent eune couronne d'êpîngnes et la mîndrent sus sa tête, et l'habilyîdrent d'un pourpre manté. I' l'achîtraient et dîthaient, "J'saluons l'Rouai des Juis!" et lî baillaient des cliamûses. Pilate s'èrdêhalit et lus dit, "Êv'chîn, j'vos l'amène pouor vos faithe à saver qu'jé n'trouve pon d'faut pouor lé condamner." Jésû s'dêhalit don, portant la couronne d'êpîngnes et l'pourpre manté. Pilate lus dit, "Né v'chîn l'houmme!" Quand les grands prètres et l's officièrs l'vîdrent, i' lus êbriyîdrent, "Crucifyiz-lé! Crucifyiz-lé!"

Prièthe pouôr not' Monde

Seigneur Dgieu

À travers chu monde qu'tu nos a donné j'viyons des choses troubliantes...

J'prions pouor l's habitants d'la Nouvelle Zélande et d'Japon auprès les trembliéments d'tèrre et l'tsunami.

J'prions pouor les cheins tchi cherchent la liberté et la démocratie en Libyie, et partout dans l'Moyen Orient.

Jé n'oublions pon les gens tchi souffrent d'aut's avâries partout l'monde.

Jé prions pouor les cheins tchi sont encombré par lus dettes quand les prix lus haûchissent et pouor les gens tch'ont perdus lus travas.

Jé prions pouor les anciens, les malades et les bliéssés.

Seigneur, rencontre-nous dans nos craintes et ouï nos priéthes.

Sai not' tou d'forche dans les sablions bouogeants et la leunmiéthe dans not' niércheu.

Aigue-nous à r'chever tan présent d'paix et garde nos tchoeux éyou qu'la vraie jouaie est à trouver - dans not' Seigneu et Sauveux Jésû Christ

Amen

Abouon d'a b c - Quite a lot of letters

Tchiques patholes Jèrriaises pouor châque lettre dé l'a b c:
A series of useful and interesting vocabulary for every letter of the alphabet:

• c'mîn = road, way
• chenna = that
• creux = hole
• côti = côtil
• chînq = five
• corbîn = crow
• châté = castle
• crapaud = toad
• chorchi = wizard
• Chent'nyi = Centenier

Prièthe pouôr la Reine not' Duc

O Dgieu, not' pèthe,

Haut et puissant, Rouai des rouais, seigneu des seigneurs, lé seul gouvèrneu des princes, tchi dé sus tan trône survil'ye touos l's habitants d'la tèrre;
èrgarde auve faveur, jé t'en prions, not' souveraine reine et duc Lîzabé.
Remplyi-lyi auve la grâce dé tan Saint-Esprit, qu'ou s'en va faithe tréjous chein qu'tu veurs et qu'ou s'en va marchi sus tan c'mîn.
Donne-lyi les beinfaits du ciel; garde-lyi en bouonne santé et en longue vie; donne-lyi d'la forche qu'ou pouôrrait assomer touos ses enemîns, et à la fîn, qu'ou pouorrait gângni la jouaie et l'bonheu à tout janmais;
par Jésû Christ not' seigneur

Amen

Texte du sèrmon

Sermon

Qué les mots d'ma bouoche et les pensées d'man tchoeu s'sait acceptabl'ye au Seigneu - Amen

Ch'est un mio drôle dé m'trouver mâté ichîn à vos adrechi. Pourtchi?

Viyant qué la dreine d'ma fanmil'ye à faithe un sèrmon 'tait man grand'pèthe Percival Scott Warren, tch'avait 'té missionaithe en Afrique du Sud et pis prêtre en anglietèrre. I' mouothit tchique mais d'vant ma naîssance.

Ch'tait ichîn à Ebénézer qué jé v'nait pour la preunmièthe fais à un sèrvice en Jèrriais dans l's années huiptante, rein qu' deux'trais ans auprès qu' j'commenchis à apprendre not' langue. Jé crai qué ch'tait m'né par Jean Picot, mais pour dithe la véthité, jé n'comprennais pon grand'chose - pas la faute au prédicateu, bein seu! Jé n'avais pon autchun idée à chu temps-là qu'à l'av'nîn jé pouôrrais mé trouver à prendre sa pliaiche - et j'espèthe qu' chein qué j'dis est pus comprenabl'ye.

J'porte tréjous l'etchusson dé l'Assembliée sus ma câsaque. Quand nou l'èrgarde dé prés, tch'est qu'nou vait? Y'a des symboles - les trais cats tchi sont du sciau du Rouai Douard Preunmyi, donné à l'île au traîsième siecl'ye. Y'a des p'tites taques tout l'tou, des lettres qui èrpresentent des sons, tchi quand i'sont mîntent ensembl'ye nos donne les mots “L'Assembliée d'Jèrriais - fondée en 1951”.

Ches symboles-là sont assez aîsi à comprendre pouor les gens d'aujourd'aniet; au mains pouor les cheins tchi sont bein edutchis, et ch'est seulement les bein êdutchis tchi pâlent l'Jèrriais! Les symboles dans l'evangile d'Saint Matchi, si bein liu par Anne Herrod, sont pus difficiles pour nous, deux milles ans auprès l's êvenements. J'comprennons les faits - Jèsû s'est arrivé dans l's alentours d' Jérusalem; il a d'mandé à ses discipl'yes d'li am'ner eune âne et un anichon et il a j'vaûché ès portes d'la cité. Quand il y entre, un fliotchet d'monde a c'menchi à êbriyer “Hèque lé Fis d'Dâvi - qu'lé chein tchi veint au nom du Seigneu sait béni!” et il' ont mînt des branques ès bouais et lus habits bas sus l' c'mîn. N'en v'là l'histouaithe. Mais èrgardons pus prés...

Tout 'tait prépathé en avanche par Jèsû auve grand'soin. À chu temps-là y'avait p'têtre 2 millions et d'mi à Jérusalem à célébrer la Pacques juive. Sans doute i' n'avaient pon autchun idée qu' Jèsû, l'angné d'Dgieu, 'tait en route à la cité pour offri sa vie pour les péchés du monde.

Les deux discipl'yes sont env'yés pour rammené l'âne et l'anichon auve les mots “Lé Seigneu en a bésoin” - i' n'y a qué deux fais seulement dans l'evangile à Matchi qu'Jésû fit sèrvi l'mot Seigneu. I'pathait qu' Jèsû savait bein qu' tchitchun veindrait callengi les discipl'yes. Jèsû 'tait à prépathé ches événements pouor que les patholes du prophète Zécharie pûssent lus accomplyi - “Dites à la fil'ye dé Sion: 'Evchîn, tan Rouai veint à té, paîsibl'ye et assis sus eune âne, et sus un anichon” - eune contraste auve l'entrée en triomphe d's empéreurs.

Ch'tait la couteunme des Juifs d'annonchi l'arrivée d'un rouai en m'ttant bas lus habits sus san c'mîn, pour montrer lus sousmission à l'autorité. Ch'est difficile aujourd'aniet d'comprendre tch'est qu'chenna voulait dithe dans l'temps d'la Nouvelle Testament. Nous, j'avons la democratie, nos drouaits et la liberté; à chu temps-là l'rouai avait un pouvé total, et la sousmission des gens 'tait totale étout.

J'avons des gens auve des branques des bouais - Saint Jean nos dit des palmes. Les palmes 'tait fait sèrvi comme singne dé victouaithe. Les Romains donnitent des palmes ès gangnants dans lus gammes, et l's empéreurs les donnitent à lus gens comme symboles dé victouaithe. Les Juifs avaient adopté la symbole et i' l'vaient des palmes pouor célébrer. Les palmes 'taient un scîn d'la victouaithe qu'Jèsû s'en vînt ag'ver contre la mort.

Chu jour-là, les Israëlites criyaient qu'Jèsû 'tait lus Rouai - lé Messie tchi s'en vînt libéther l'Israël dé l'otchupâtion. Lé pays avait 'té otchupé par les Babyloniens, les Pèrses, les Grecs et les Romains pouor pus qu'chînq chent ans. Il' attendaient un héro, et tout la scène racconté par les evangelistes èrsembl'ye à l'entrée d'un rouai ou d'un génétha triomphant. I' fitent des Hosannas - les cris d'un peupl'ye tchi voulaient êt' libéthé - Hosanna traduit veurt dithe “Sauvez-nous achteu!”

Les gens tchi célébraient l'arrivée d'Jèsû li souhaitaient la beinv'nue comme Messie. I' n' comprennaient pon tch'il 'tait là pour lus libéthé des pechés d'la Nation et du monde. Les cheins tchi li vantaient aniet à Jérusalem sont les mêmes tchi vont crier pour sa crucifixion dans quat' jours d'ichîn.

Pour nous, la chouaix est aîsi: J'allons-t'i' suivre lus exempl'yes? Jèsû nos a dgèrni qu'i' y a des gens tchi ne s'sont pon convaintchu, tchi n'vont pon li suivre jusqu'à la fîn - mais pour les cheins tchi veulent la vie étérnelle, ch'est inutile d'crier “Hèque lé fis d'Dâvi” si jé n'sommes pon prêt à li suivre à la crouaix vendrédi et jusqu'à aniet en huit, chu dînmanche glorieux tchi nos promîns qu'la vie continnuetha auprès la mort ichîn-bas auve not' seigneu au ciel.

Amen

La Pâque Flieuthie - Palm Sunday

Un mangnifique sèrmon prêchi par l'Sieur Tony Scott Warren à ch't' arlévée au sèrvice d'L'Assembliée d'Jèrriais. Et des gâches auprès l'sèrvice étout!

A great sermon in Jèrriais (with a dash of Armenian) at this afternoon's service in Trinity. And with cakes to follow!

Un but d'la Bibl'ye - Scripture snippet

Des buts en Jèrriais d'la Bibl'ye pouor l'annivèrsaithe d'la vèrsion Angliaîche d'la Bibl'ye dite du Rouai Jacques, ou Autorisée:
Jèrriais Scripture snippets to mark the anniversary of the English translation of the Bible known as the King James or Authorised Version:

Et l'lendemain, y'avait un amas d'monde tchi 'taient là pouor la fête et tch'avaient ieu l'brit qu'Jésû 'tait pouor v'nîn à Jérusalem, et i' prîndrent des branques ès palmes et lus en fûdrent à seule fîn d'l'achîtrer, en briyant, "Eune bénédiction sus l'chein tchi veint au nom du Seigneu, l'Rouai d'Israël!" Et Jésû êpyit un ânichon et s'y'êtchèrfroutchit; coumme ch'est êcrit dans l's Êcrituthes, "N'sai pon êffritée, fil'ye dé Sion, ch'est en tchi né v'là tan Rouai tchi veint assis sus un ânichon."

La sicrèche - Drought

BBC Jèrri rapporte:

Jersey entered an "absolute drought" after 15 days with no significant rainfall. The company responsible for Jersey's reservoirs, Jersey Water, said the reservoirs were full but more dry weather could cause problems.

Ch'est la sicrèche! Ou bein la s'crèche, ou sécrèche, coumme nou veurt. Né v'chîn du vocabulaithe et des buts d'textes:

• sicrèche / s'crèche = drought
• sé = dry
• i' fait sé = it's dry weather
• l'affaithe est secque = it's dry weather
• nou sèqu'thait des baleines = it's dry enough to dry up whales
• sé coumme d'la bûche = dry as a bone, etc
• sé coumme du brotchet = dry as a bone, etc
• sé coumme du pain = dry as a bone, etc
• sé coumme du bouais d'alleunmette = dry as a bone, etc
• sé coumme du rigot = dry as a bone, etc
• sé coumme du brési = dry as a bone, etc
• sé coumme du tondre = dry as a bone, etc
• s'tchi = dry
• stchez = place or stream that dries up (in old-fashioned spelling squez, hence Le Squez)

Avanchons souotre ses bouonnes banniéthes - Vexilla regis - The royal banners forward go

Un cantique en Jèrriais pouor Pâques - ch'est eune vèrsion dé The royal banners forward go ou Vexilla regis:

Avanchons souotre ses bouonnes banniéthes,
viy'-ous la crouaix et sa leunmiéthe?
Né v'là la chai d'la Criâtion
racatée pouor not' vièr trison.

Clioué au bouais, i' fut pèrchi
par l'arme d'un soudard et sangnit;
chu sang bénîn et ch't' ieau divinne,
né v'là dans tchi qu'i' nos ouâchinne.