La Lettre Jerriaise Samedi 10 d'Avri 2004

 La Lettre Jerriaise Samedi 10 d'Avri 2004

 

Aniet l'Samedi d'Pâques, le 10 d'Avri 2004, et ch'est acquo un plaisi pour mé, Clifford Laisney d'vos donner tchiques pensées en vos presentons la Lettre Jerriaise.

 

[Hier etant Vendredi Saint me r'souvins trejous comment que quand j'tais mousse j'tait la couteumne dans la compagne de mangi des fliottes pour le diner. Quouaiqu' j'avaits 'tait el've sus la ferme et que mes pathents ergardez la mangie d'fliottes commes iune des d'lices de l'annee, pour de me j'en pouvez pas les souffri. J'taits bein pus a m'n'aise auve un filet d'saumon ou d'mouothue. Dans les temps d'paques, sustout parmi les gens d'maturite, ch'est acquo la couteumne de tchuithe des merveilles, les efants attendent auve impatience l'arrivee d's'eux d'chocolat, et ch'est la saison etout d'echangi d'cartes en sontes exprinnons la jouaie et bouons souhaits d'la Resserection du Christ.]

 

Suivant le temps ténèbreux des jours d'hiver quand toute natûthe a 'tait en r'pos, ch'est trejous pliaisant de r'vaie la r'naissance de toutes pliantes s'ecliattant en r'jouaissement du r'nouvé. Soudainsment, les fossés erverdissent, les p'tites bouonnefemmes, les belles toutes nus, les gzettes, lus revillyes en epanissant a la jouaie du r'nouvé. Les arbustes erveinnes en bouton, les parterres d'herbes erverdissent, et l's'herbes fraiches fauchies offre un parfun si pliaisant. Les patates ayant dormi suous terre pusieurs semaines fonts lus appathence et dans rein d'temps lus casâque de plastique s'écarte déch'lons les d'lices de la nouvelle saison. Les bourdons et l's'oiseaux s'appathe, s'announcant en chant dans les p'tites heuthes du matin. Même j'avanchons l's'houologes d'une heuthe, donnant une cliarté d'jour dans les belles sethées. Toutes chés choses announce la nouvieauté, la nouvelle vie.

 

Dinmanche passé, j't'aimes a celebrer le Dinmanche des Rameaux. Ch'ést la celebration de l'occasion quand Jesu fit s'n'arrivée a Jerusalem. J'l'iasons dans la Biblye comme tchi que les gens pliaichais des branques et feuillage dams les rue d'la ville expressons lus jouaie en faisant la beinv'nue a lus Rouai. Acquo achteu dans tchiques'unes de nos eglyises je celebrons ch'occasion, même auve l'aidde d'un ane, en nos r'souv'nons d'la manniethe que Jesu entrit Jerusalem faisant vaûchage sus l'dos d'un ane.

 

Dûthant les jours suivant jusqu'au Jeudi Saint, je liaisons comment que les Principaux et Scribes du Pays s'assemblittes en orde de determiner la manniethe d'addrechi la mort de Jésu.

 

Ch'tait au souper d'chu Jeudi Saint que Jésu réalisi que iun de ses disciplyes, Judas, allait le trahiri. Le lendemain, Vendredi Saint, Jésu fut presenté d'vant Pilate, et auprés avait 'tait atchusé faussement de pusieurs chose, i fut condamner a mort. Pour les disciplyes devouées a Jésu, la s'm'naine de Paqiues comme j'la connaissons est un temps d'lamentation et d'déchu. Un temps quand toute espethence autha 'tait a l'abandon, et une grande victouaithe pour ses ennemins. Mais pour le Chrétien, la Réssurection de Jésu a changi la c'min d'la vie.

 

Comme la natûthe, je rejouaissons d'une nouvelle vie. Comme le changement des tenêbres des jours d'hiver a la r'naissance du r'nouvé, je c'mmenchons un nouvieau chapitre tchi nos promet grâce et satisfaction. Quouaiqu' la vie n'ést pas trejous un liet rosyi, j'avons l'assûthance qu'a tuous temps j'avons un applié sus tchi que j'pouvons d'pendre.

 

J'vos invite de r'flèitchi sus chés pensées et si l'appetit vos prend, de payi une visite au tchulte demain, le Dinmanche de Pâques. Chés si important auprés une periode de lach'té de r'chèrgi les batt'ries.

 

Pour hardi d'gens les temps d'Paques sonts acquo une bounne raison d'se rejoui en vacances, et pour hardi d'gens ch'est bein importante de passer un temps dans la compagnie d'lus efants et fanmillye. Ch'est etout un temps quand les gens s'rejouissent dans les d'lices des merveilles, une spécialité si bein erconnue dans la compagne. Dans l'temps d'ma jeunnesse ch'tait la couteumne trejous de mangi des fliottes pour le r'pas du Vendredi Saint. Quouaiq' j'avais 'tait él'vé en ferme, et ma mêthe tchuisait trejous des fliottes, j'tait un fricot que j'n'aimaits pas. Acquo au'jourd'aniet j'sis bein pus a m'n'aise auve un bouon filet d'saumon ou d'mouothue. Ch'est la saison etout quand l's'efants attende auve impatience des oeux d'chocolat, et ch'est l'temps etout d'échangi en cartes les bouons souhaits d'la saison.

 

A tuous les malades et les gens tch'onts souffert la tristesse a chès drein, j'offrons nos priethes et éspethance que la vie s'en va prendre un c'main pour le meilleu.

 

Veronica m'joins en vos offrons l'bouon jour, espethonts qu'ou s'allez bein rejoui des fêtes et celebrations d'Paques.

 

Ayiz tous une bouonne semaine.

 

A LA PRECHAINE

 

 

Clifford Laisney