Lettre Jerriaise Dinmanche le 29 d'Août 1999

 Lettre Jerriaise Dinmanche le 29 d'Août 1999.

 

Bonjour a touos les gens tch'écoute la letter Jerriaise aniet Dinmanche le 29 d'Août 1999. Ch'és Clifford Laisney tch'a l'pliaisi d'la presenter.

 

Nos v'la arrivée a la fin d'un autre mais. Demain setha la dernier fête légale devant les fêtes de noué. Avous print d'avis comme tchi qu'un coup la Bataille de Flieurs est passée les jours onts appathence d'accourchi, deja achteu quand vint huit heuthes du sé la niet c'mmenche a tchaie. En génerale j'avons connu d'meilleurs étés que ch't'année. Enfin, faut vivre souos éspèthance qu'un p'tit été d'st Martin assistetha a raccourchi les longs jours d'hiver.

 

Dûthant les dernier deux ou trais mais, sus les journals, le radio et la television, j'avons lu et entendu toup entouors le grand spectaclye tchi s'arrivit le 11 d'Aout. Oui, j'refèthe a l'Eclyipse. Une occasion quand l'solé passit directement driethe l'empliaichement d'la lune. Ch'tait en 1927 la dernier fais que ch'nna s'arrivit dans not contrée du monde, et malgré que j'taits par les c'mins, j'confesse que j'nait autchune connaissance du spéctaclye, j'taits trop confortablye dans mon ber pour prendre intèthet dans ch'nna tchi s'passer.

 

Les astrologues nos avaits predit que bieaux que j't'aimes pas dans l'c'min directe de l'éclyipse, quand-même j'pouvaimes nos attendre qu'el jour dev'n'thait presque niet, les oiseaux r'tournaits a lus nids, les poules ithaits lus jutchi (et j'pense bein poundrées deux fais l'même jour). Ch'tait essentiel de porté des lunnettes speciale a cause de la severité du solé un coup tch'il appather d'la lune.

 

Eh bein j'crai que s'fut un grand d'ssapointment. Le solé 'tait ombrer par les nuages, le jour ne nierchi pas comme j'm'attendaits, et j'nait pas entendu d'un surplus d'oeus sus l'marchi. Grace de la téchnologie du television, i fut possiblye de vaie de magnifiques portraits transmittés d'un avion d'autsus les nouages. J'comprends que la prechain éclyipse autha lieu dans nenante ans. J'me doubte si y'autha autchun d'més ecouteurs par les c'mins, mais faut espether qu'el temps setha pus cliait pour chutte occasion.

 

Sans doubte ou s'etes tous au couorant és triste evenements tchi' veinnent de s'passer dans La Turtchie duthant les dernier tchinze jours. J'en pouvons pas c'mmenchi d'nos imaginer la tristesse et d'gât causer par le tremblyement d'terre d'une dimension comme tchi s'arrivit a 3 heuthes du matin quand la population 'tait en r'pos. I pathaits que les batisses écroulites comme un patchet d'cartes, entèrrant tout dans son c'min, meublye, possessions, motos, et au mins 40,000 vies. Des milles futent bliéssés, et ch'tait auve tendrement d'tchoeu que j'observimes le d'gât, le traitement d'bliéssés dans les rues, étant qu'les hopitaux etaits remplyies. Auve l'aidge du television j'vimes les portraits d'survivants travaillons a bras d'corps parmi la matchiethe cherchant pour membres d'fanmillyes, et vaisins.

 

Tchi jouaie quand un p'tit éfant, mêthe, pêthe, frêthe, soeur, étaits soul'vées du godin, ayant vetchu auprés avait 'tait trappés pour plusieurs jours. Tchi couothage des volontèthes tch'avaits laissi lus siez ieux en orde d'assister a sauver vie parmi l'fourbi et en conditions dangereuse causer par infection et maladie. I s'en va faller longtemps d'vant qu'el batissement ersetha r'pather, mais les vies perdues ne sethonts janmais rempliaichies. I nos és dit que i'a' possibilité d'une continnuation de tremblyement d'terres pour les prechaines vingt ans, et d'même l'av'nin dans chês contrêes du monde n'est pas bein encouoragante.

 

Acquo une fais comme tchi que j'pouvons etre ermerciants de d'meuther dans une partie du monde ouaiqu' je jouissons d'une vie d'trantchil'té.

 

Nos priethes sonts auve touos les victînmes de chutte tragedie. Puis-que Dgieu les souolage dans lus temps d'incertain'ter et les aid'tha a comprendre et accepter une situation inconnue.

 

Nos pensées sonts etout auve touos nos membres d'fanmillyes et anmins, tchi sonts malade et qu'ont souffert la tristesse derniernement.

 

J'vos souhaite une bouonne journée. Puis-qu'el solé erlie génetheusement sus toutes vos entreprinses chutte semaine.

 

A LA PRECHAINE.

 

Clifford Laisney