1966: L'Appétit veint en mangeant!

 L'Appétit veint en mangeant!

 

Ottawa, Ontario,

Canada.

Le 2 d'juilet, 1966.

 

Moussieu l'Rédacteu,

 

            “ As-tu ouï qué l'bouanhomme Amice Le Cacheux s'en va sé r'mathier ? ”, Manman dit à Papa l'aut' sé.

 

“ I m'sembl'ye en aver ouï tchique bourdon'nie dans la forge,” Papa lî dit.

 

“ Bon ! Et tu n'mé l'avais pon dit ! ”, s'fit Manman.

 

“ Bah ! ”, Papa lî dit, “ Jé n'prends pon d'avis à tout l'bêtîn qu'nou ouait d'temps en temps, mé ! Un homme a bein d'aut' choses à li otchuper l'esprit sans s'embêter la tête d'un tas d'niolîn d'même. Enfin, si ch'est vrai, i' dev'thait aver pus d'avis à s'n âge. Il est vyi comme les rues et bête comme eune ouaie tchi coue sus des pièrres. Tch'est tch'i' voudrait mathier un vièr nieaumin comme li ? ”

 

“ Man Doue d'la vie,” Manman lî dit. “ Auve touos ses hèrpins i' n'éthait pon d'peine à trouver eune femme ! ”

 

“ Mais, il en a dêjà ieu trais ! ”, Papa lî dit, “ Et i' n'fut janmais maître siez-li. Auve ses hèrpins i' les gâtait d'trop, et tu connais bein l'vièr diton : ' Tchi poulotte sa femme trop sétha beintot Moussieu n'dit Mot ! ' ”

 

“ Ch'est un diton tch'a 'té inventé par un homme, ch't ila ! ”, s'fit Manman. “ S'il a 'té si bouan à ses trais femmes, v'la tchi montre tch'i' connait la valeu d'eune femme, et il en méthite bein eune quatrième, chu pouorre vyi ! ”

 

            “ Quant à mé,” s'fit Papa, “ J'veur bein. S'i' veurt sé r'mathier ch'est d'ses affaithes. Mais jé n'vai pon comment qu'eune femme voudrait mathier un vyi tch'a un pid dans la tombe. I' faudrait qu'oulle éthait envie d'un homme. Enfin ch'est vrai qu'y a du drap à la boutique pour tous. As-tu ouï tch'est tch'i' s'en va mathier ?”

 

“ Mais oui ! ” Manman lî dit. “ Ch'est la bouannefemme Missis Le Bœu ! ”

 

“ Bon ! ”, s'fit Papa, “La bouannefemme Betté L'Bœu ? Eh bein sé m'n âge ! Oulle est pus vielle qué li ! I' dév'thait au mains en mathier ieune tch'est janne assez pour lé souangni et lî frotter l'dos. Il est couôsu d'rhoumatisses ! I' pathait tch'il en est chèrgi comme la mouque à myi. Mais ch'est pour li. Il en a fait d'toutes les sortes sénon la bouanne. Iun d'ches jour i' s'en va touanner ses quat' fièrs en l'air ; ch'est en tchi i' f'tha mus dé s'dépêchi quandis tch'il a la forche d'aller à l'églyise pour sé faithe mathier ! ”

 

            “ Mais i' n'dait pon êt' si malade comme tu voudrais nouos l'dithe, ” s'fit Manman. “ J'ai ouï tch'il a fait d's arrangements pour aller en France pour la leune dé myi ! ”

 

“ Eh bein, ” Papa lî dit, “ Jé n'savais pon tch'i y'avait un navithe tch'allait en France ches jours, mais ch'n'est pon bein liain pour aller à Carteret. P't êt' tch'i' y'en étha iun pour les cheins tchi veulent aller à la Faithe de Lessay, et tchi lus mathiêthont dans chu temps-là. Lé bouanhomme a assez d'sou pour lé viage et les louogements là-bas, mais i' faut tch'il aime chutte bouanfemme-là pour en dêpenser tant. Ouaithe tch'i' gâtait ses trais preunmié femmes, il éthait cartélé un liard en quatre quand ch'tait tchestchion d'dêpenser un sou sus li-même. Dans l'temps tch'i' fèrmait et tch'il anm'nait ses j'vaux à la forge, i' mé d'mandait tréjous d'lî tondre ses j'veux atout la tondeuse pour les j'vaux. Dé même i' n'avait pon à payi l'barbyi. Jé m'faisais un pliaisi d'lî tondre la tête à râs, et v'la tchi n'li dêpliaisait pon viyant qu'v'la tchi li sauvait des sou ! ”

 

            “ Y'a-t-i' longtemps qu'oulle est veuve, la bouanfemme Le Bœu ? ”, Manman dit à Papa.

 

“ J'pense tch'i' y'a chinq ou siez ans,” Papa lî dit. “ Jé n'sai pon s'tu-as connu san bouanhomme. J'lé connaissais bein, car i' v'nait à la forge au sé dans l'hiver bavarder auve les vaîsîns quand j'tions à faithe des fièrs dé tchéthues. Ch'tait un bouan vièr corps, lé bouanhomme Le Bœu, et j'crai tch'il 'tait iun des dreins d'sa fanmille et qu'oulle est quâsi péthînmée à ch't heu. J'l'avais connu quand j'tions mousses dévant qu'j'allîsse apprandre ma vocation siez ton-ton L'Brun à St. Jean. I' marchait en pithette dans ses vièrs jours. Il aimait hardi les flieurs. Au r'nouvé i' tchilyait toutes les flieurs sauvages lé long des fossés et les portait à sa bouannefemme, et il avait l'pus bieau gardîn d'flieurs du vaîsinné. I' travaillait à san jour et i' n'avait janmais d'peine à trouver du travas car il 'tait bouan ouvriyi. Au Dînmanche l'arlévée il allait tréjous s'assièthe sus les monts au haut d'L'Êta. Un Dînmanche i' n'tait pon r'vénu siez li à la niet, et sa bouannefemme en avèrti l'Chentnyi. I' l'trouvidrent sus l'pus et sans connaissance sus l'mont endrait l'Hôtel dé L'Êta. I' mouothit l'lendemain sans r'prandre connaissance. I' pathait qué ch'tait la maladie d'tchœu tchi l'avait tchulbuté d'même.

 

            “ Ouaithe tch'i' n'avait janmais gangni grands sou, les deux vièrs avaient vêtchu bein trantchil'ment et avaient couoyé, et comme i' n'avaient pon ieu d'êfants i' n'lus avait pon couôté hardi à vivre. Comme il' avaient mîns tchiques sou d'côté, la bouannefemme Betté a mênagi à gabather jusqu'à ch't heu, mais ch'est sans doute eune bénédiction pour lyi qué l'bouanhomme Amice s'est mîns dans la tête dé r'mathier. J'lus sou'aite jouaie ! “

 

George d'La Forge