1969: Excursion à Lamballe

 Excursion à Lamballe

 

Mardi, l'19 d'août, 44 membres arrivitent au aérodrome pour lus départ à neuf heuthes chînq, mais y'avait trop d'bliâse et auprès aver arrêté pour passant quatre heuthes, les membres sortitent dans les eune heuthe et, arrivant à Dinard en bieau solé auprès aver passé la douanne, dans lé char-à-banc et en route pour Lamballe passant à travers dé Plancouët. À deux heuthes nou-s-arrêtit à l'Hôtel Angleterre pour dîner un couplye d'heuthes tard; un mangifique èrpas dé siex assiettes fut servi et bein apprêcié par tous. auprès, lé Président èrmercyit l'Hôtel Angleterre, et les membres bûtent à la santé dé L'Assembliée, dé la Maison Boutin et l'hôtel.

 

Au haras

 

D'ichîn dans lé char-à-banc pour lé haras, tchi fut trouvé freunmé, mais à cause des circonstances j'fûmes alloués d'entrer. Les gardins à l'entou du haras si bein gardé et propres, et dé si bieaux j'vaux dé toutes couleurs, des j'vaux d'course, et y'en avait tchi p'saient jusqu'à un tonné. les j'vaus 'taient dans les êtabl'yes à être nettis auprès lus jour. J'vîmes les at'lages, la pliaiche où'est qu'les j'vaux ont lus exèrcice et lé bel iou qu'i' paradent. Les membres 'taient êmerveillis dé vaie ch't' immense pliaiche.

 

D'ichin à travers eune difféthente route à Dinard pour eune autre mangnifique èrpas à l'Hôtel dé Cornouailles dans les siex heuthes et d'mie. Ch'tait ichIn qu'lé Sieur Le Liard nos donnit les nouvelles qu'i' fallait rester la niet. Y'en avait pus d'contents qué d'maris! Tchi d'aut' faithe sinon nagi? Tous fûtent mîns en mangnifique hôtels par lé Sieur Le Liard tch'avait travailli bein dû tout l'jour pour nos pliaithe.

 

Eune aut' jour

 

Auprès eune bouanne niet et un bouan dêjeûner tous 'taient frais pour c'menchi eune aut' jour. Coumment qu'i' s'n allait fini jé n'savaîmes pas: enfîn lé solé 'tait acouo auve nous, tréjous. les membres sortitent d'la ville dans les neuf heuthes et d'mie pour l'aérodrome. ichîn i' fut décidé qué 36 sortithaient dans les douze heuthes et les aut' membres à siex heuthes et d'mie lé sé. Lé Sieur Le Liard fit san d'ver et r'vint auve ieux. les membres tch'y fûtent 'taient bein èrmèrciant à li pour tout s'n embarras.

 

1969