1964: La rêunion mensuelle

La rêunion mensuelle 

 

La rêunion mensuelle eut lieu vendrédi, l'29 dé mai, dans la Salle d'Agritchultuthe, St. Hélyi, et eune chentaine dé membres lus y rêunîtent.

 

Dévvant yiéthe lé rapport dé la derniéthe rêunion, lé Président d'mandit ès membres pour eune minute dé silence en mémouaithe dé Madame Rondel et la Démouaiselle Noël.

 

Lé rapport dé la rêunion du mais d'avri fut liut et adopté, et deux nouvieaux membres futent êlus.

 

A la Nouvelle Zélande

 

Après qué la correspondance avait 'té lyue, lé Présdident fit la beinv'nue au Sieur E.J. Le Feuvre, qui v'nait nos donner une séthée en nos raccontant entouare san viyage en Australie et à la Nouvelle Zélande avec lé Sieur George Le Feuvre. I' sortitent dé Southampton lé 20 d'novembre 1963, abord lé Canberra, et i' traversitent la Baie dé Biscaie sans prendre grand exercise! Il' arrivitent à Naples auprès quatre jours, et tandis qu'il' 'taient la i' visititent les ruinnes dé Pompéii. I' vîtent lé Mont Vésuvé et à Stromboli u' y'avait un éruption d'un volcan. Traversant la Canal dé Suez il' arrivitent a Colombo lé 4 dé décembre, et là il' vitent une mosquée bouddhiste. après tchiques jours en mé, il' attèrîtent a Freemantle, épis à Melbourne, où-est-qu'lé Sieur E.J. Le Feuvre rencontrit san fréthe et la famille. Les deux fréthes né s'étaient pas rencontrés pour 31 ans, et nou peut s'înmaginer qu'i'y avait d'la jouée, et d'la fête, et du catchet, et comme Noë s'appréchait, la chaleur dévait monter par-dédans comme déhors!

 

Après la nouvelle année, les v'yageurs s'en futent en Nouvelle Zélande, à North Island. Ichîn à Roturua i' vitent les sources caudes, dé ieau tréjous bouillyante, et la terre alentou est caude assez pour y tchuithe un bouan dîner. Ichîn étout il' vîtent les Maoris, les vrais natifs dé la Nouvelle Zélande.

 

Dans l'South Island, à Picton et Nelson, lé pays était vraiment magnifique - dé belles bouais'sies, des rares flieurs, et des montagnes. Dans ches cantons i'y a des Jèrriais, et les Mêssieux l'Feuvre 'taient bein contens d'en rencontrer, aussi bein comme les siens dé là-bas, qui 'taient si contents d'en recontrer qui v'naient justément dé tchitter lus p'tite île i' n'y avait que tchiques sémaines!

 

Une grand surprînse

 

Lé Sieur Le Feuvre nos dit qu'un jour il' 'taient entrains dé d'mander à un jeune couple pour des renseign'ments entouor eune "bus", quand la dame sé touânnit et lé r'connut, en l'nommant! Il eut une grande suprînse... ch'tait une jeune St. Pierraise!

 

Il' r'vintent à Freemantle et après tchiques jours lus en futent pour Singapore et Penange et après, par avion a Bagkok. Ichîn i'y avait bein des chose întérêssantes... les douzaines de templyes, lé "marchi flyottant", les p'tites rues remplyies d'monde dé toutes les nations. i' y a bein des précautions à prendre ichîn, car les gens n'sont pon trop partitchulièrs entour lé mangi! Après aver ertouanner à Colombo, les deux Jèrriais r'embèrtchitent en route pour Southampton sus l'Canberra, un baté bein confortablye.

 

Après ch't întérêssant discours, lé Sieur Le Feuvre nos montrit de portaits en couleur, qu'il avait prîns, mais qui nos faisaient envie dé prendre une longue vacance etout! Chutte partie du monde n'est pas acouo trop gâtée par la vie moderne dé l'Ouest.

 

Des portraits

 

Lé Senateu P. Romeril nos montrit des portraits qu'il avait prîns lé jour dé la visite de L'Assembliée en France, l'année passée, et l'jour du dîner de L'Assembllaïe d'Guernésiais au mais d'janvyi.

 

La Dlle. F.M. Hacquoil, dé la part des membres, ermercyit le Sieur Le Feuvre pour san mangnifique discours et les portraits qui tout ensemblye nos avait donné une séthée hardi întérêssante, et en même temps ou' r'mercyit lé Senateu Romeril pour ses portraits, qui ram'naient dé bouannes mémouaithes.

 

Lé Député Quérée annoncit lé Service Annuel à la Chapelle d'Ebénêzèr pour Dinmanche lé 28 dé juin, à 3 heuthes, et la visite à l'abbaye dé la Lucerne pour mardi, l'25 d'Août.

 

1964