1968: Rêunion au Fort Régent

 Rêunion au Fort Régent

 

Vendrédi, l'31 dé mai, à 7 heuthes et d'mie du sé, à bein près eune septantaine dé membres lus rêunîtent au Fort Régent pour eune séthée en pliain air. I' faisait si bé, ch'tait vraiement eune séthée chouaîsie.

 

L'architecte lé Sieur W.H. Davies 'tait là pour explyitchi l's affaithes et montrer par-dessus l'Fort.

 

Lé Sieur Davies c'menchit par faithe ses apologies pour aver à adréchi les membres en Angliais et dit qu'i' comprendraient mus s'n Angliais qué san Jèrriais! San discours était bein întérêssant, car i' dounnit l'histouaithe du Fort, coumment qu'il avait 'té bâti dans huit ans souos la direction du Lieutenant-Général Humphrey, étant fini en 1814, et qu'i' n'y'avait janmais ieu un coup d'tithé dé d'là par les Jèrriais ou Angliais dans la d'fense dé l'Île dépis chu jour-là. Lé Sieur Davies explitchit étout lers difféthentes parties du Fort et lus raison d'être et dit qué, pliaichi coumme il est, i' n'pouvait pas être attatchi sinon du sud. Des 60 vrégies du Mont d'la Ville, la pus grand' partie était entourée des grand' fortes muthâlles en granit 18 pids d'laîse. Lé bel parade couvrait sept vrégies d'terrain et les barraques eune autre quatre vrégies, et d'ssus des barraques i' y'a huit pids d'terre. Ch'fut bein întérêssant de suivre lé Sieur Davies et vaie les apartements en belle pierre, où'est qu'les soudards restaient, 14 par apartement, mais bein seux les officièrs n'étaient pas si patchis, ayant eune apartement châque pour ieux et lus valet.

 

Suivant l's affaithes, lé Député A.C. Quérée dounnit un discours qu'avait 'té arrangi par lé Député Vernon Tomes.

 

L'av'nîn

 

Auprès aver dêjà ouï eune partie d'l'histouaithe et veu l'Fort, tout l'monde prîntent un divers întéthêt dans l'dêveloppement du fort à l'av'nîn; coumment qu'les sept vrégies d'la pliaiche dé la parade s'en allaient êtres couvertes et qu'i' y'éthait toutes sortes d'amusements dans les apartements et un Musée Militaithe dans les cachots 45 pids souos terre.

 

Heûtheusement nulle des bâtisses né s'en vont être dêmolis et les gens pouôrront lus promener tranchilment dans les gardins car lé trafi n'étha pas l'drouait au fort.

 

Ch'est eune grand' entréprinse qui s'en va prendre bein d's années d'vant être finie, mais lé conmité en chèrge èspéthe d'en ouvri des parties au publyi dévant bein longtemps.

 

Lé discours fini, lé Président èrmèrcyit lé Député Quérée et tous pour lus présence dans eune saison si embarrasante.

 

La date du Service Annuel fut annoncée pour lé 30 dé juin à Philadelphie à 3 heuthes.

 

 1968