1912: A Scheming Mother's Little Plot

 A Scheming Mother's Little Plot

 

Y'a dèja longtemps qu'Lonôre n'est pas dans ses canettes; ou n'dit mot, ou pend l's'ouies, ou s'en va trainant ses chavette d'un bord et d'lautre, et s'n'appétit n'est pas ch'qui soulait être. J'ai bieau lis grée dé p'tits fricots; lis fricachi d'l'oignon; lis bouoillyi d'la caboche; l'i'èstuivé des bênis, et mitounné des têtes de vieau pour en hallé l'jus; jusqu'a d's'oeux qué j'y'acate au prix qui sont pour tâchi d'lis r'méttr' du tcheu. - Rin n'y fait! Ou n'veurt don pon manji d'mes fricots; ch'qu'ou brinotte, ch'est des fielles de laitue, du crésson, et des tas d'chucrins! J'en sis au m'eyéspé! San poummé d'gambe a molli d'deux pouces et ses cauches traînent sus ses talons, sa chintuthe ne m'zuthe pus qu'trente-sept pouces a l'entou, et ses lèvres sont couleu' d'potté.

 

L'aut' jour, la p'tite Miss Selous - a ch'que j'ai oui, car, pour dé mé, je n'y'alli pon - r'citi eunne Piéche et ma - belle-soeu Sophie Pain (la sienne qui vend d'la graine de snichon dans l'marchi-a-lard et qu'est veuve de san trèsieme) m'disait, quand j'y'eut conté mes peines: "Ch'n'est pon des laits-d'poule qui lis faut" a ta Lonôre; ch'est.... et ou s'appréchi tout près pour mé pâslé dans l'ouothelle, viyant qu'Piteur 'tait la a faithe sembliant d'liéthe la gazette, et qui n'est pas tréjous bon de dithe ch'que nou pense ès hoummes... "Ch'est d'même et d'même, qu'nou m'dit en clyintant; comprends tu, a ch't'heu?"

 

Ou pouéz l'créthe! que j'comprins! V'la tchi m'fit pensé a man jeunne temps, quand j'tais ronde, et fraiche, et rose et blianche partout, et que l'sang m'bouoiounnait dans l's'ouies, et j'dis a sophie que j'm'en allais r'gardé atouore de mé (y'a dèja pus d'eunne pôse que j'm'en otchupe) oquo pus du que d'vant.

 

Et pour dithe le vrai, j'ai pus d'eunne fais r'mérychi un jeune houmme qui pouôrrait (faute de mus) faithe not' affaithe. Ou n'êtes pas sans l'avé r'mértchi vous mêmes, chu jeune houmme la; ch'est li qui soiogne l's'èscrituthes a bas, dans l'office. Il est haut, il est blianc, sa pé r'lîze; et quand y souorit, nou dithait la bouoche d'eunne toute petite fille. Et solide! J'ai oui Piteur dithe qui l'a veu cratchi eune coconette entre ses deux mains et faithe le tou d'l'office avec la femme qui vint s'crobbé pendue a ses dents par la cheituthe! Sans doute, y'a out' chose que la forche et la bieauté. Y faudra que j'm'informe de sa condite. Autant qu'pôssibye j'tchiendrais a ch'que man bieau-fils s'ait un Christian Endeavour, un Y.M.C.A., un C.E.M.S., et un Catch-my-pal; et s'il 'tait en même temps un S.P.C.A., un Band-of-Hope et un Little Helper, j'en sait d'autant mus. J'm'informethait la d'sus sans faithe mine de rin; et si ch'est tout a fait "all-right" de chu bord là - et qu'il ait tchiq' sous - j'dithai a Piteur d'l'invité tchiq' Samedi au sé pour béthe-du-tée et joué a 'hunt the slippeur' avec mé et Lonôre. S'il avait l'air d'etre èsgallué par la bieauté d'ma fille - et n'y'a qu'eunne méthe pour en vaie les preumié signes - nou pouôrait organisé des proumnades, l'invité a v'né avec nous au Tchulte, lis dithe d'apporté sa fliûte pour joué des duos avec Lonôre, enfin lis faithe comprendre que faute de mus il avait ma permission pour faithe la carre a ma fille. J'allais même [...] doux et respectueux envers [...] jusqu'a lis permettre de sorti tchiq' fais l'sé avec Lonôre, dans les rues bin èscliéthies d'la ville, pour vaie les boutiques: bin entendu que j'siéthais par driéthe ov man paraplyie.

 

Tout chenna, ou comprennez, en pâsle entr' nous. N'y'a rin d'décidé, et si, en attendant, y'avait tchiq' fis d'fermi....?

 

Laizé Pain

The Morning News 14/12/1912