A Scheming Mother's Little Plot
Y'a dèja longtemps qu'Lonôre n'est pas dans ses canettes; po n'dit mot, ou pend l's'ouiës, ou s'en va trainant ses chavettes d'un bord et d'lautre, et s'n'appétit n'est pas ch'qui soulait être. J'ai bieau lis grée dé p'tits fricots; lis fricachi d'l'oignon; lis bouollyi d'la caboche; l'i'èstuivé des bênis, et mitounné des têtes de vieau pour en hallé l'jus; jusqu'a d's'oeux qué j'y'accate au prix qui sont pour tâchi d'lis r'méttr' du tcheu. - Rin n'y fait! Ou n'veurt don pon manji d'mes fricots; ch'qu'ou brinotte, ch'est des fielles de laitue, du crésson, et des tas d'chucrins! J'en sis au m'eyéspé! San poummé d'gambe a molli d'deux pouces et ses cauches traînent sus ses talons, sa chintuthe ne m'zuthe pus qu'trente-sept pouces a l'entou, et ses lévres sont couleu' d'potté.
L'aut' jour, la p'tite Miss Selous - a ch'que j'ai oui, car, pour dé mé, je n'y'alli pon - r'citi eunne Piéche et ma - belle-soeu Sophie Pain (la sienne qui vend d'la graine de snichon dans l'marchi-a-lard et qu'est veuve de san trèsieme) m'disait, quand j'y'eut conté mes peines: "Ch'n'est pon des laits-d'poule qui lis fait" a Lonôre; ch'est... et ou s'appréchi tout près pour mé pâslé dans l'ouothelle, viyant qu'Piteur 'tait la s faithe sembliant d'liéthe la gazette, et qui n'est pas tréjous bon de dithe ch'que nou pense ès hoummes... "Ch'est d'même et d'même, qu'ou m'dit en clyintant; comprends-tu, a ch't'heu?"
Ou pouéz l'créthe! que j'comprins! V'la tchi m'fit pensé a man jeunne temps, quand j'tais ronde, et fraiche, et rose et blianche partout, et que l'sang m'bouoiounnait dans l's'ouies; et j'dis a Sophie que j'm'en allais r'gardé atouôre de mé (y'a dèja pus d'eunne pôse que j'm'en otchupe) oquo pus du que d'vant.
Et pour en dithe le vrai, j'ai pus d'eunne fais r'mértchi un jeune houmme qui pouôrrait (faute de mus) faithe notr' affaithe. Ou n'êtes pas sans l'avé r'mértchi vous mêmes, chu jeune houmme la; ch'est li qui soiogne l's'èscrituthes a bas, dans l'office. Il est haut, il est blianc, sa pé r'lîze; et quand y souorit, nou dithait la bouoche d'eunne toute petite fille. Et solide! J'ai oui Piteur dithe qui l'a veu cratchi eunne coconette entre ses deux mains et faithe le tout d'l'office avec la femme qui vint s'crobbé pendue a ses dents par la cheintuthe! Sans doute, y'a d'aut' chose que la forche t la bieauté. Y faudra que j'm'informe de sa condithe. Autant qu'pôssibye j'tchiendrais a ch'que man bieau-fils s'ait un Christian Endeavour, un Y.M.C.A., un C.E.M.S., et un Catch-my-pal; et s'il 'tait en même temps un S.P.C.A., un Band-of-Hope et un Little Helper, j'en s'ait d'autant mus. J'm'informethais la d'sus sans faithe mine de rin; et si ch'est tout a fait "all-right" de chu bord là - et qu'il ait tchiq' sous - j'dithai a Piteur d'l'invité tchiq' Samdi au sé pour béthe-du-tée et joué a 'hunt the slippeur' avec mé et Lonôre. S'il avait l'air d'etre èsgallué par la bieauté d'ma fille - et n'y'a qu'eunne méthe pour en vaie les preunmié signes - nou pouôrait organisé des proumnades, l'invité a v'né avec nous au Tchulte, lis dithe d'apporté sa fliûte pour jouer des duos avec Lonôre; enfin, lis faithe comprendre que faute de mus il avait not' permission pour faithe la carre a not' fille. J'ithais mème, si j'lé vais doux et respectueux envers mé, j'ithais jusqu'a lis permettre de sorti tchiq' fais l'sé avec Lonôre, dans les rues bin èscliéthies d'la ville, pour vaie les boutiques, bin entendu que j'siéthais par driéthe ov man paraplyie.
Tout cheunna, ou comprennez, s'en pâsle entr' nous. N'y'a rin d'décidé et si, en attendant, y'avait tchiq' fis d'fermi.....?
The Morning News 14/11/1912
No comments:
Post a Comment