1911: Why Missis Pain got indignant

 Why Missis Pain got indignant

 

Ch'n'est pon m'n amor de trouvé a r'dithe sus rin. Châtchun s'pliait coumme nou dit; mais, tout d'même, y'a des fais qué l'tcheu m'touonne quand j'vé les teurs de certaines persounnes qu'niu counnait si bin. Y'a Nancy Brache. Nancy Brache, pour les siens qui la counnaissent, ch'n'est jommais qu'la fille a Douard Ernon qui fut bin aise d'emprunté chinquant louis d'nos gens, quad y s'trouvi en d'sous d'ses affaithes après la bordée de fraude de litcheu dans tchi y s'trouvi touôllyi a sa honte. Eh bin! Nancy Brache - de tchi qu'ch'est me qu'ethais 'tai Missis Brache si j'avais dounné l'moindre encouothagement a s'n'houmme - devthait bin se souv'né d'you qu'ou sort, et n'pon s'dounné l's'airs qu'ou fait - qu'nous en rit quand oul a l'dos touonné.

 

Achteu qué j'sommes villais, et qu'nou s'dét a sé même de hanté des gens respectabyes, et j'eumes not' preumié "at home" la s'maine passée. Tout fut ben arrangi dans l'parleux. Les tchaises 'taient ben drettes contre la muthâlle, la tabye au mitan, ov un touffet d'flieurs en papi dans la bolle a salade qu'Piteur gagni a tithé au blianc, un djéthidon dans la carre ov des 'buns' et d'la gâche de deux sortes, sus tchi y'avait un morcé d'mouslinne pour empèchi les môques ; sus eunne autre petite tabye y'avait l'bouan set a tée, man pot-a-tée en 'plated' qui r'lise coumme de l'argent, et les douze tchulliers dé batème a Lonôre.

 

J'taîmes assises, Lonore et mé, dans nos bouans habits ; mé ov ma robe de verte souée, et Lonore en pink mouslinne, et toutes les deux ov un gant a la main gauche. Bétot né v'la la clioche qui sounne, et y'un des p'tits porteux d'gazette que l'Bos avait prèté pour l'arevée s'en fut érchevé la visite et lus d'mandè lus nom pour le dithe en ouvrant l'parleux. Not' lav'resse 'tait dans la tchuisinne a bouollyi l'ieau et faithe des beurrées.

 

Ch'tait Nancy Brache! Ch'n'est pon pour trouvé a r'dithe, mais s'ou'l avait fait servi un mio pus d'savons a s'lavé l'co, ch'n'est pon ch'quil en éthait couôté! Enfin, coumme je n'sis pon d'la sorte pour trouvé a r'dithe, je n'y'en fis pon la r'mérque! Et pis, oul avait l'air pinchie; et quand Nancy a l'air pinchi, autant n'pon l'èstibotchi. Bétot né v'la tres dames qu'entrent ensembye : je n'les counaissais pon, mais y m'dounites lus cartes. J'lus dis, tchi bieau temps qui faisait, si'ls avaient bin joui du sermon Dinmanche au sé, et si lus servantes coutchaient a lus gout - coumme nou m'avait dit qui fallait pâslé a un 'at home.' Y m'd'mandîtes des nouvelles de Moussieu Pain, s'il avait oquo des frouéts au co, si ch'tait mé qu'avais fait chutte bouanne gâche, et qui voudraient bin avé la fotografie d'Lonôre. Du coin d'l'yi, j'viais Nancy Brache qui s'pinchait d'pus en pus viyant qu'persounne ne li pâllait ; et pis ou dit tout d'un co : "Dis mé, Laizé, tan bieau-frèthe travâlle ti oquo sus les routes? J'cré quasi qu'chest li qu'j'ai veu en m'en v'nant ov eunne chiviéthe et un g'nèt sus la route de Saint Cliement!"

 

Par bounheu j'mé souv'ni en temps du verset qui dit que si t'en'min t'frappe sus la joe, y faut lis dounné aussi ton vèt'ment; et j'me tu. Mais j'sounni la clioche, et quand l'garcon vint vaie pourtchi, j'lis dit en anglyais: "Open the door, Edward, Missis Brache is goin' 'ome quick!" Et ou s'en fut, quick! Et si jommais chét' la a l'affront de r'vené pilé sus man tapis, j'lis...... j'lis... tril'lai san bonnette!

 

Mais tchès qu'ou voulez? Ch'la n'a jommais 'té en compagnie, ni a des 'at homes', ni nulle part, ni d'meuthé en ville! Ch'la n'a pas d'manners; et parcqué s'n'houmme gâgni eunne fais l'preumi prix au Show d'Ste. Mathie pour de la rouoge caboche - v'la tchi s'cré tchiq'un!

 

Madame Laizé Pain

The Morning News 14/12/1911