1913: How that Laizé shall soon be well

 How that Laizé shall soon be well

 

Djeu merci, je r'séthai bétot sus pid! Tout est a la vaubathe dans not' mênage. Y'a du ponci dans toutes les carres, d'shéthognies a toutes les bréques, deux d'mes lachefraies ont l'fond brulé; et les titheurs!! Tout chin-d'sus-d'sous et pêque-mêle: des morciaux d'savon parmi les tchulliers, des gants d'kid dans la casse a coutieaux, d'la canelle dans l'canisteur a tée, et jusqu'a des poummes tchuites dans la pouchette du bouan fro a Lonore. J'en ai pour eune' pose a tout r'metr' en r'pathe sitot que j'pourai gabathé un mio mus.

 

Ma gambe r'sétha bétot en t'nanche sinon qu'y'étha trejous eunne longue mérque ou-ès qu'Piteur mé dolli avec sa brioche: man docteu m'a asseuthe qu'avec le temps je r'pouorais m'r'assiéthe sus eunne tchaise a condition que j'me gardéthais trejous cantée du bord gauche.

 

Enfin! Tout est bin tchi finis bin; et j'ai grand sugét d'être r'counaissante de touos les bouans soins et de toutes les p'tite ettentions qu'nos gens ont yeu pour mé tchi n'en méthitais pon la maintchi. Tchès qu'ch'est tout d'même d'avé ieu la chance de tchée sus un bouon houmme coumme man Piteur! et tchi grande bénédiction d'avé eunne fille douoche et compliaisante coumme ma Lonore. Ah! n'en v'la ieunne qué j'peux dithe s'a un trésor pour le sien qui vindra un jour, s'pliait a Djeu, nos l'èscrachi des bras! Car, n'y'a pas a teurtillyi la d'sus, ch'est un fiêre trésor que la fille a Laizé Pain! Et si j'vos disais, justement monièthe de pâslé, que l'mênage avait 'té un mio néglyigi - ch'est pas pour la blieaumé, allez! L'fond d'mes lachefrais est ruiné, ch'est vrai; mais ch'est d'la faute au tcherbon qu'était d'sous, et qui s'mint a fliambé tandi qu'ou 'tait a pratitchi eunne Pieche qu'oul avait quazi pensé r'cité sus l'Stage, a la Distribution d'Prix d'la Chapelle ou-ès qu'prêche un certain p'tit pasteur qu'est v'nu souvent m'faithe la Léctuthe chès derniers temps. Mais mettez seulement ma Lonore a la tête d'un menage, ov deux ou três servantes pour faithe le travas et eunne bouonne belle-méthe pour dirigi - et ou vérrêtes ma fille dans s'n'êslment!

 

Pour en dithe le vrai, tout d'même, ma Lonore a la tête un mio touonée tout chu temps par des Piéches. Tchiq-un - j'mé doute que ch'fut Moussieu Luce, de la Nouvelle - y'a envié par la poste un volume de piêches en Jerriais (êscrites par un pathent a nous, un Bilo d'St. Ou, tchi nos fit un affront y'a tchiq' temps dans eunne affaithe de partage, et qu'nou n'hante pon d'pis) et ou les sait quazi toutes par tcheu. S'ou la viyaites marchi "un-an-down" en tappant du pid, et secouant ses corles, en touonant l's'iers, et en fliantchant ses bras d'un bord et d'l'autre, et en hurlant la ou-ès qu'a Pieche merque qui faut hurlé! Ch'est un "treat." J'en eut yun, l'aut' sé, quand i' r'vintes du concert a Esther Ford, au Pavilion. La chiéthe êsfant m'rêsvillyi pour mé r'cité la Pican'resse. Ou r'citi si bin, ses iers 'taient si féroces, san poing s'appréchait si près d'ma fache, que èj'fini par avé quazi peux! J'm'èsgouffi a plieuthé! et j'eut a lus faithe sinne de la main que j'n'en pouais pus. Mais n'y'a pas a dithe le contraithe - ch'est un "treat" de l'entendre, quand nou n'est pas malade.

 

Laizé Pain

The Morning News 20/11/1913