Eune réchinne Wesleyenne!
Fort Lauderdale, Florida,
U.S.A
Le 21 dé févri, 1970
Moussieu l'Rédacteu,
Dans ma lettre du trais d'janvyi dé ch't année, j'vouos disais que l'Sieur Ernest Mouothant, fis dé feu Philippe Le Sueux Mouothant tch'êcrivait l'Jèrriais souos l'nom d'plieunme dé Bram Bilo, mouothit subitement à Auckland dans La Nouvelle Zélande lé 19 dézembre, 1969.
Dans sa lettre m'annonçant la triste nouvelle du décès d'san p'pèe, sa fille Lucille mé dit que ch'tait Herbert Philip Mouothant, l'couôsîn gèrmain du défunt, tch'avait fait l'sèrvice d'entèrrement. Quand j'lî êcrivis eune lettre dé condoléance, j'lî d'mandis si l'couôsîn 'tait prêtre Anglyican ou minnistre non-conformiste. J'veins d'èrchéver eune lettre du Sieur Herbert Mouothant li-mème. Oulle est si întérêssante qué j'm'en vais vouos en donner des détails. I' s'sont cèrtainement d'întéthêt pour touos m's anmîns Méthodistes en Jèrri. J'allais quâsi dithe "m's anmîns Wesleyens" mais jé n'vai janmais l'nom Wesleyen en Jèrri à ch't heu. I' n'dait pon êt' populaithe dé nous jours ouaithe que nou n'ouïyait pon pâler d' 'l'Églyise Méthodiste' - ch'tait ''La Chapelle Wesleyenne'' - quand j'tais mousse et pus tard janne homme dans l'office à Moussieu Charles William Binet, un vraie Wesleyen, un fanmeux prédicateu et iun des miyeurs hommes tch'a janmais vêtchu. Ch'tî-la pouvait dithe, auve justification, ''Comme nous pardonnons a ceux qui nous ont offensés''. Car il 'tait tréjous prêt a pardonner les gens tch'en avaient contre li ou tchi disaient du ma d'li!
Herbert Philip Mourant fut né à La Nouvelle Zélande. Ses pathents 'taient John Elias Mourant d'la pâraisse dé St. Sauveux (fréthe du fanmeux Philippe Le Sueur Mourant), et Alice Rachel Ann Tourgis, fille du Révérend Philippe Tourgis, minnistre Wesleyen. Le Reverend Tourgis minnistre Wesleyen. Le Révérend Tourgis avait 'té ordinné minnistre par la Conféthence Méthodiste Wesleyenne à Londres dans l'mais d'août mil huit chent vîngt-deux, et à cause dé sa connaîssance dé la langue Française i' fut env'yé à Paris et d'vînt iun des fondateurs du Méthodisme Wesleyen en France. Pus tard, i' fut minnistre d'cirtchuits en Aur'gny, Dgèrnésy et Jerri, et ch'tait li tchi pliaichit la preunmié pièrre dé La Chapelle dé Grove Place et tch'en fut l'Minnistre. Lé Sieur Mouothant dit dans sa lettre que y'a dans les chent vîngt ans qu'la Chapelle dé Grove Place fut bâtie. I' n'en est pon d'liain. Quand j'tais en Jèrri l'année passée, j'dêcouvris qué ch'tait le 10 d'octobre, 1847, qu'ou fut ouvèrte.
Lé Sieur Mouothant, tch'est li-mème prédicateu Wesleyen à La Nouvelle Zélande, mé dit tch'il a 'té en Jèrri deux fais et qu'à châque occâsion il eut l'honneu et l'privilège d'êt' învité à condithe lé sérvice et prêchi dans la Chapelle dé Grove Place et dans un tas d's aut' chapelles en Jèrri, et il en pathaît ordgillieux comme un poux tchi marche sus du v'lous!
I' m'dit, étout, dans sa lettre, qué iun d'ses grands anmîns 'tait l'défunt Juge Philip Ernest Brée, et qué san p'pèe et lé p'pèe du Juge 'taient à l'êcole ensembl'ye en Jèrri. I' n'y a pon d'doute qué l'Sieur Mouothant est un grand admithateu du Juge Brée, car i' mentionne qué l'Juge 'tait “Député Bailli, Trésôryi d's Etats, etc. “ Le p'pèe et la m'mèe du Sieur Mouothant avaient (d'après sa lettre) fait partie d'la congrégâtion d'la Chapelle dé La Rocque, et quand i' vînt en Jèrri i' fut învité à présider l'sèrvice des récoltes lé 3 d'septembré, 1939, dans chutte chapelle-là, et ch'tait à ch't occâsion-là qué l'Juge Philip Ernest Brée sé butit et întèrrompit l'sèrvice pour annoncer la tragique nouvelle que l'Angliétèrre 'tait en dgèrre contre l'Allemagne.
Herbert Philip Mourant m'dit tch'il a 'té prédicateu pour souoxante-trais ans, ch'est en tchi, comme mé, i' dait aver d'l'âge! Il est un bantchi r'tithé, et il a appathemment 'té eune grosse tête dans les banques. Ayant 'té nommé ségrétaithe du “Bank Officers' Guild” dé la Nouvelle Zélande. I' m'dit, étout, tch'il est expèrt en orthographe et qu'sa spécialité là-d'dans 'tait la dêcouvèrte dé fausses sîngnatuthes. I' fut mathié chînqante-siex ans, et sa femme mouothit y'a quatre ans. Il a trais êfants. San fis a 58 ans et est bantchi. Ieune dé ses filles est dans l'Afrique du Sud, et la deuxième démeuthe auve li. Et j'sis învité à aller les vaie à la Nouvelle Zélande. Il avait un fréthe tch'était fèrmyi là-bas. I' mouothit y'a siex mais.
Quand j'rêpondrai la lettre au Sieur Mouothant, j'éthai l'pliaîsi d'lî dithe que j'ai bein connu l'Sieur Philip John Brée tch'était l'compangnon d'san p'pèe à l'êcole, et qu'j'ai connu san grand anmîn l'Juge Philip Ernest Bree étout, car i' v'naient souvent visiter Moussieu Binet quand j'tais dans s'n office. Madame Binet 'tait Mdle. Eva Mary Brée, la soeu au Juge. J'm'èrsouveins qué l'Juge avait un fis nommé Oswald tchi v'nait souvent à l'office auve san papa.
Y'a-t-i' tchitchun en Jèrri tchi s'èrsouveint dé ieune ou des deux visites du Prédicateu Herbert Philip Mouothant quand i' prêchit dans la Chapelle dé Grove Place et dans la Chapelle dé La Rocque en septembre, 1939?
No comments:
Post a Comment