1912: Why Piteur would not take Lonôre to the Show

 Why Piteur would not take Lonôre to the Show

 

Quand j'dis a nos gens, Mèscrédi passé qu'j'avais dans l'idée d'allé au Show d'Boeux, né v'la les deux femmes qui s'mîntent a d'vîsé dans eunne carre auprès du drécheux, et j'entendi Lonôre d'mandé a sa méthe si san fro d'blieue sarge pouorrait faithe, ou l'blianc a picots, ov le chappé a plieunmes de resté; et si ch'tait la mode de met' des gants ou pas a un Show d'Boeus?

 

Ni gants ni fro! que j'dis. N'y'a qu'des braies qui vont ès shows d'boeus! et j'sis be èstounné d'té, Madame Pain, d'pensé a envié ta fille vaie cheunna! "Ch'est qu'j'avais pensé, Piteur, vé tu, qu'y'éthait là un fliotchet d'fils d'fermi, en gaiteurs et tunettes, a proumné l's'animaux endret les Juges; et qu'si Lonôre 'tait la ov san bieau chapé a s'proumné "up-an'-down" endret les fils d'fermi, y'éthait offuche chance que tchiq'un d'yeux, après avé fini d'montré san boeu ès juges, vindrait li même s'montré a not fille.

 

La fille de Piteur Pain n'îtha pas au Show d'Boeux, que j'dis tout sec. Pus tard, au Show de G'niches du mais d'Mais, je d'dis pon; mais un show d'boeus, ch'est pour des hoummes seulment. Lonôre restétha ichin, a couôtre; j'm'y'en vais tout seu!

 

Y'avait du bestias au Show; et y'en eut pus des tres-quarts qui n'eutres pon d'prix. Pour tchi raison? j'n'en sait trop rin, car a oué pâslé d'monde souos la tente a Mess Couillard - j'y passi l'pus bé du temps, a cause du ponsi - les gagneurs avaient tous des d'fauts. Trop d'bathi, pas assez d'croupe, la coue trop drette, les cones trop teurques, pas assez d'distance ichin, l'affaithe trop rapprechie là... et un tas de d'fauts sus toutes les couôtuthes. Et pis les juges, a oué pâslé l'monde, 'taient les pus fières achocres que nou pièsse trouvé; et avaient, chose seuthe, prins en considéthation les points des propriétaithes en jugeant les bêtes; même que "l'reféree" avait 'té veu r'mué l'nez du bord de Nicklesse R'non en pînchant la couenne du boeu a Ph'lip Sivrai. Un tas d'partialitées, a les oué d'visé en bévant; et tant pus qui bévais d'lirmins, tant pus y viyaient d'qualitées ès bêtes qu'avaient 'té batues.

 

"En éthous deux d'gouts?" s'fit Tom Fieuthi - J'soummes couôsins germains; san bieau-pethe mathi la nièche d'la deuxième femme a l'onclye de sa premié amouotheuse. J'en eûmes quatre ou chinq - a cause du ponsi, et y m'emni vaie san gris boeu faite du White Horse et d'la vaque Three Star, y m'dit, qu'avait 'té vendue pour chent fûts d'biéthe à Moussieu Jonni Walker). Quand j'vînmes a la plieche ou-ès qui prétendait avé amathé san boeu, n'y'avait qu'eunne mielle ov eunne corde tchi pendait - l'boeu 'tait hort! J'laissi Tom Flieuthi assis sus eunne poutchie d'bran a èscouté tchiq'un dithe qu'il avait veu l'boeu dans eunne van Saint Martinnaise, mais qui n'pouôrait r'counnaitre l'cacheux!

 

Après r'avé 'té souôs la tente ramasé man paraplyie et vaie si y'avait d'la conviéthie en allant - n'y'en eut pon! - j'm'en r'vint siez nous douochot'ment en m'appiant contre les maisons (l'ponsi!) et quand j'fut ramonté, l'idée m'print qu'autant valait s'couochi tout d'un coup pour avé eunne bouonne niet de r'pos.

 

Tchi ponsi!

 

Piteur Pain

Morning News 18/4/1912