Les D'vis du Bouan'homme George
J'sis à Paris. J'èrgrette que Bram Billot et sa femme né sont pas auve
mé. I' m'éthaient p't'êt' învité d'aller auve ieux vaie l'Président d'la
République, mais j'n'éthais pas peut l'y'aller quand-mème, viyant qu'j'ai
laissi man Bill Tappeur en Améthique, et j'éthais p't'êt' d'la peine à en
emprunter iun ichîn! Ch'est seux que l'Président s'ersouveint bein d'la visite
de Bram, - tch'était Chant'nyi d'St. Ou dans l'temps tch'i vînt à Paris.
Paris n'a pas changi.
Ieunes des preunmié choses que j'ermèrtchis en attendant pour crouaîsi la rue
en sortant d'la Station d'Montparnasse 'tait qu'les gas tchi cachent des
vouaituthes s'entr'însultent comme i' faîthaient l'y'a eune quarantaine d'années.
Lus langage vaut la peine d'êcouter quand i' faut qu'iun d'ieux attenge pour l'autre!
I' s'entr'traitent de touos les vices. Ch'est seux tch'i' n'ont pas apprîns chu
langage-là à l'êcole de Dînmanche! J'mé d'mande tch'est qu'i' s'es'sait arrivé
si Moussieu Pépîn ou Moussieu Barascud nouos avaient ouïs pâler d'mème à St.
George, - i' n'nouos éthaient certainement pas permîns d'monter dans la classe
de Mess Maugi Laîesse!
“Tch'esqu'i t'à dit qu'tu peux cachi un moto, té, sorte d'îmbécile?” iun
dîsait à l'aut'! “Tu n'pouorrais pas seulement bouler eune chuviéthe comme i'
faut!”
“Et pis té, maniéthe d'âmice,” lî rêponds l'aut': “Tu dév'thais êt'
acouo à t'nîn les cotillons à ta m'mèe, - sai-t-alle que tu-es abanon?”
“Oui, ou' m'a env'yié ichîn pour êt' însulté par un achocre!"
“Sapresti, tu m'traite d'achocre?
Veur-tu qu'jé d'valle pour t'apprendre à cachi chu moto-là?
“Oui, - tan camion îtha mus tout seu!”
Les chicagnes vont et veinnent de
iun à l'autre bein pus vite que jé n'peux l's'êcrithe, et justément quand nou
crai tch'i' s'en vont s'entre battre la veue à la carre du carrefour touanne
verte et camions et motos c'menchent à rouler et vont quédaine jusqu'au préchain
arrêt comme si l'Satan 'tait souotre ieux!
I' s'excitent pour eune bagatelle, nos
anmîns. En b'vant eune fais dans l'café l'aut' jour auve A, B, et C. - A d'mandit
a B à tch'il heuthe que l'train d'trais heuthes sortait. Dans deux'trais s'gondes
i' pâlaient touos ensemblye en mème temps et à tue-tete, - tchiquechose comme
chenne-chîn:
A. A tch'il heuthe que l'train
d'trais heuthes sort?
B. A trais heuthes et d'mie!
C. Noufé, - ch'est à trais
heuthes un quart!
A. J'criyais que ch'tait à
trais heuthes, mé.
B. J'té dis qu'ch'est à
trais heuthes et d'mie!
C. Sabre de bouais, - j'té
dis qu'ch'est à trais heuthes un quart!
B. J'sai bein ch'est à trais
heuthes et d'mie. J'l'ai prîns bein des fais, mé!
C. Et mé étou! Ch'est à
trais heuthes un quart!
B. Ah! mais qu'tu'es têtu! J'dev'thais
bein saver, mé, viyant qu'm'onclye Ph'lippe travâlle dans la station!
A. J'lé connais bein, t'n'
onclye. I' n'erconnaît pas eune ho'louoge d'auve eune baronmétre!
B. Ah! ch'là, ch'est trop! N'en
v'là assez! Comment tch'i pourrait gangni sa vie s'i' 'tait si bête?
Et pis, ch'est m'n'onclye!
A. Tu'as
rêponnu ta tchestchion!
C. Allons, garcons! N'ayiz pas d'brit. Ch'n'est
pas la peine, dépis que j'vouos dis qu'ch'est à trais heuthes un quart!
Nou dithait tch'i' sont à
aver du brit, - i' pâlent à touos les trais à hauteu' d'vouaix, et si vite que
nou n'y'connaît ni bliu ni blianc! A s'touanne a mé et m'dit: “Tch'esqu'ou-s en dites, vous George, - n'est-che
pas à trais heuthes?”
“Eh bein,” j'lî rêponnis tout douochement :
“Ch'est bein aîsi d's'en asseuther,- i' n'y'a qu'à d'mander au Bureau des
Renseignements!”
Tout
d'un coup tout l'monde est calme et l'garçon veint remplyi les vèrres et j'sommes
tous les millieurs anmîns du monde! Quant à ch'là, j'mé d'mande souvent
pourtchi qu'les peuplyes né peuvent pon vivre l's'uns a coté d's'autres et êt'
bouans vaisîns et bouans anmîns. Ch'est si aîsi d'êt' anmîns quand nou s'entr'connaît!
Sans doute, nou n'peut pas tous êt' les mèmes caractéthes et aver les mèmes
idées, - l's'uns sont excitablyes et l's'aut' sont calmes, - l's uns lus gènent
pour un rein, et rein n'dêrangent les autres! P't'êt' que si les gens d'toutes
nations pouvaient s'entr'visiter d'temps en temps, i' veindraient à vaie qu'y'a
du bouan dans touos les peuplyes s'nou prend la peine de chèrchi pour!
Les Chroniques de Jersey 1/5/1948
No comments:
Post a Comment