Mémouaithes d'Aut'fais

Né v'chîn l'texte d'aniet d'not' auteu du mais, Amelia Perchard:

Here's today's text by our author of the month, Amelia Perchard:

Mémouaithes d'Aut'fais

Né v'là l'solé qui s'couoche dans l'vouêt,
Le ciel si sombre amène la niet;
L'été n'a fait que d'châtchi d'main
Et l's'tembre sus d's ailes s'est envolé;
Et l'hivé auv' sa drôle d'heunmeur,
Nos dgèrnit qu'l'année est sus l'pus ;
I' m'sembl'ye qu'che n'tait qu'la s'maine passée
Qu' l'année toute neuve entrit souos l'us.

Les jours, les mais, l's années s'envolent,
Et i' m'sembl'ye qu'i' n'y'a pon longtemps
Qu'auvec mes fréthes et soeurs j'étais
A d'meuther siez nos chièrs pathents;
Sept en fanmille, j'étions unis,
J'accordaîmes du matîn au sé;
Not' péthe chrêtchien 'tait notre exempl'ye
Et j'l'adoraîmes de tout not' tchoeu.

Tchi vie paisibl'ye était la nôtre,
Dans chu temps-là, hors à janmais
Qui m'a laîssie tant d'belles mémouaithes
Des bouans vièrs temps qu'j'avaîmes aut'fais!
Not' méthe, si bouanne, auv' sept êfants
Trouvait l'temps d'ouï nos p'tites minséthes,
Et chaque sé quand j'allaîmes au liet
Nos faisait tous dithe nos priéthes.

Et Noué - hélas, j'vai l'gros podîn!
Sept cauches pendues à l'ais d'foyi,
Et touos nous, mousses, si excités
Qu'i' n'y'avait pon moyen d'dormi
Mais p'tit à p'tit j'tchittîmes l'êcole
Et dans l'monde chantchun fit san c'mîn,
Travaillant dû, jouissant d'la vie,
Mais r'gardant tréjous à l'av'nîn.

J'croch'taîmes d'la dentelle par la verge,
J'ouvraîmes des cauches pour péthe et fréthes -
L's hivièrs assis au pid du feu,
Et l's hoummes passaient lus temps à liéthe.
Le jour que j'm'engagis étout
Es'sa tréjous dans mes pensées,
Et man mathiage tellement parfait
Qui m'dounnit jouaie pour tant d'années.

Vraiment, ma vie a 'té heutheuse,
Je n'pense jamnais que j'ai d'ergrets;
Car dans chutte vie, j'ai tréjous ouï,
Faut prendre le bouan auv' le mauvais;
Bieau qu'l'année, coumme ma vie, s'en va,
A grandes engambées pour sa fîn,
Je n'laîsse pon chounna me gêner,
Car, quand j'y pense, ch'est coumme chounnechin -

Ch'n'est qu'eune année pour ajouôter
Ès quatre-vîngts qu' j'ai dêjà veu,
J'sis bein à m'n aise dans man fauteuil,
Caude et sans souci près d'man feu;
Quand les fliambes erlisent sus man meubl'ye
Que j'ai poli auv' tant d'amour,
J'pense ès anmins que je r'verrai
Quand j'm'en ithai étout un jour.

Car chu jour-là arrive pour tous,
Bein souvent quand nou n' s'y'attend dgéthe;
Mais combein d'monde quand lus tout veint
Sont dingnes de rencontrer not' Péthe?
Pourtant, nou-s-a tous bein apprins
Tchi c'mîn qu'faut prendre pour s'y trouver,
Et coumment qu' j'nos r'trouv'thons ensembl'ye
Si jusqu'à but j'gardons la Fouai!