Ma Pâraisse

Né v'chîn l'texte d'aniet d'not' auteu du mais, Amelia Perchard:

Here's today's text by our author of the month, Amelia Perchard:

Ma Pâraisse

Ch'est St Martin, qu'est ma pâraisse,
Ou'est qu'mes anchêtres pour bein longtemps,
Ont vêtchu tous dé péthe en fis,
La vie paisibl'ye dés bouans vièrs temps!

Sa côte si belle est l'envie d'tous,
Dé Gouâré, jusqu'au fond d'Rozé,
Lé bieau briselames dé Ste Cath'rinne,
La pointe d'la Crête, la Baie d'Flitché!

Ses miles dé ruettes, bordées d'fossés,
D'bieaux bouais, et d'muthâlles dé granni,
Qué nou trouve partout la pâraisse,
Donnent à tout l'monde divèrs pliaîsi!

Lé vièr châté si ordgilleux,
Comme j'savons, car san nom nos l'dit.
Monté en garde comme dé tout temps,
Si formidabl'ye sus san rotchi!

L'églyise auvec san haut cliochi,
Toutes ses f'nêtres dé vèrre couleuthé.
Ou'est qu'nou trouve la fouai et la paix,
Dans s'n înmense trantchillité!

Y'a eune municipalité
Qui n'aime pon vaie trop dé changements;
Et tâche dé garder not' pâraisse,
Eune pliâche speciale pour nos d'scendants!